Diplomati qullersaq: Naalagaaffiit namminersortut suleqatigiit pilersinneqarsinnaapput
Naalagaaffiit namminersortut suleqatigiit pilersinneqarsinnaapput.
Martin Breumip Kalaallit Nunaata naalagaaffinngornissaanut oqallinnermut atatillugu atuakkiaani tamanna siunnersuutigineqarpoq.
Kalaallit Nunaat, Savalimmiut Danmarkilu suleqatigiillutik ataqatigissutissaminnik ujaasisariaqartut, aallartitap Peter Taksøe-Jensenip atuakkiami "Hvis Grønland river sig løs"-imi oqaatigaa.
- Naalagaaffiit namminersortut suleqatigiit pilersinneqarsinnaapput, assersuutigalugu nunanut allanut sillimaniarnermullu tunngasut ilaat Kalaallit Nunaannit Savalimmiuniillu tigummineqarlutik, Kunngikkormiunulli tunngasut, aningaasat, illersornissamullu tunngasut suli ataatsimoorunneqartut, Peter Taksøe-Jensen oqarpoq.
AAMMA ATUARUK Issittumut tunngasut uani atuakkit
Aqqut taanna atorneqartuuppat Kalaallit Nunaat Savalimmiullu naalagaaffinngorsimassapput, Peter Taksøe-Jensenilu naapertorlugu naalagaaffiit marluk taakku Naalagaaffiit Peqatigiinnut ilaasortanngorsinnaassapput, nunanullu allanut tunngasut namminneq akisussaaffigilissallugit.
- Savalimmiormiut kalaallillu kissaatigisaat aallaavigalugit sulisoqassaaq, inuiaqatigiillu imminut napatillutik ineriartuaarsinnaassapput. Danmarkip ilinniartitaanermi peqqinnissaqarfimmilu periaasii piumagunik atorsinnaavaat, uagullu nunasiaateqarniatut isigineqarunnaassagunaraluarluta, Peter Taksøe-Jensen oqarpoq.
Naalagaaffiit namminersortut suleqatigiit pingasut pilersinneqarnissaannut siunnersuut piviusunngussappat, tunngaviusumik inatsit allatut nassuiarneqartariaqalissaaq, Atlantikullu avannaata Folketingimut ilaasortaatitani annaassallugit.
Martin Breumip atuakkiaa "Hvis Grønland river sig løs" ullumi marlunngornermi saqqummersinneqassaaq.
Kalaallit Nunaata naalagaaffinngorsinnaanissaa atuakkiami eqqartorneqarpoq. Atuakkiortup Martin Breumip, Issittoq pillugu ilisimasallip, atuakkiamut atatillugu ilaatigut Kim Kielsen, Suka K. Frederiksen, Danmarkillu statsministeria Lars Løkke Rasmussen oqaloqatigai.
AAMMA ATUARUK Namminersulivinnissap oqallisigineqarnerata pingaarutillit ukkanneqanngitsoortippai
Danskit nunanut allanut tunngasunut politikkiannut kaammattuutini, aallartitap Peter Taksøe-Jensenip nalunaarusianngorlugu 2016-imi maajimi saqqummersippai.
Issittup Danmarkimi naalakkersuisunit ukkatarineqarnerunissaa nalunaarusiami pineqartumi ilaatigut kaammattuutigineqarpoq.
AAMMA ATUARUK Vittus: Taksøep nalunaarusiaa annilaarnarpoq
