Nunatta karsia RG-ip sinneqartoorutaanit 64 millioninik iluanaaruteqartoq
Raajat qalipallit, qalerallit saattuallu isertitaqartitsilluarput, raajalli uusut qalipaajakkallu akerlianik qaammatini qulingiluani siullerni ilungersunartorsiorfiusimallutik.
Namminersorlutik Oqartussat suliffeqarfiutaat tusagassiutinut taama nalunaaruteqarpoq.
Raajat qalipallit aalisarneqarluarnerat, niuerfinnilu tuniniarluarneqarnerat suliffeqarfimmut angusarissaartitsipput, siornalu angusat qaangerneqarlutik. Royal Greenlandip qaleralinnik nunarsuarmi tunisaqarnerpaatut inissisimaffia 5 procentinik qaffappoq, Japanimilu aningaasarsiorluarnini pitsanngoriaateqarfigilluarlugu.
Issittup saattuai Quin-Sea Fisheries aqqutigalugu piumaneqarluarlutillu akigissaartut Japanimi USA-milu niuerfiulluarnerpaani tunisaalluarnerat 2016-imili ingerlalluarpoq, sulilu tamanna attanneqarluni.
- Akerlianilli saarullik Atlantikup avannaaneersoq Royal Greenlandimut amigartoorutaajuarsinnarpoq. Taamaakkaluartoq aalajangerpugut Nutaaq-mik Maniitsumi suliniutitsinnut aningaasaliissutivut attatiinnarniarlugit, Royal Greenlandip pisortaanera Mikael Thinghuus oqarpoq.
AAMMA ATUARUK Sermitsiaq.AG oqaluttuarisaanermi aatsaat taama sinneqartoortigisoq
Royal Greenlandip angusaqarluarneratigut Namminersorlutik Oqartussat, taamalu nunatta karsia, iluanaarutit affaannik 64 millionit koruuninik agguagarsissapput.
Royal Greenland Namminersorlutik Oqartussanut agguagarsisitsinermigut, akisussaassuseqarfigalugillu atukkanut akilersuinermigut ukiuni kingullerni tallimani 555 millionit koruuninik taamaasilluni akiliuteqarsimavoq.
Suliffeqarfissuup sulisui 2533-upput, taakkunannga 54 procentit Kalaallit Nunaanni atorfeqarlutik.
AAMMA ATUARUK Pisortat aningaasaqarnerat sinneqartooruteqangaatsiartoq
