Rasmus Nivelu Tønder Festivalimi appisimaaqataassasut
Jyllandip kujasissortaani festivaali ukiut tamaasa pisartoq aggustip qaammataani ulluni sisamani pisussaavoq kalaallillu nipilersortartut marluk Nive Nielsen aamma Rasmus Lyberth appisimaaqataassapput.
Nive Nielsenip Rasmus Lyberthillu Tønder Festivaalimi peqataanissaat una siulliunngilaq.
Nunap inoqqaavisa nipilersugaat ukioq manna sammineqassapput, kalaallillu marluk peqataanerisa saniatigut ilaatigut Canadamiunik, Australiamiunik saaminillu appisimaartoqassaaq.
Festivaalip nipilersortunut siuttuata, Maria Theessinkip, Canadamiinnermini sammisap suussaneranik isumassarsivoq.
Canadamiinnermini nipilersortartoq indianereq, William Prince, sakkortuumik atugaqarnini pillugu oqaluttuartoq, naapippaa:
- Indianeriugami taxarsinnaanngitsoq, indianeriugami aningaaserivimmi checkimik aningaasanngortitsisinnaanngitsoq allallu. Tamakkua ullutsinni atuunnerat tupaallaatigeqaara, taassumalu tamakkua tamaasa eqqarsaataalersippai, Maria Theessink oqarpoq, nunallu inoqqaavisa ataatsimut sorsuutigisaasa suunera oqaatigalugu:
- Ingammilli inuit namminneq oqaatsitik atorlugit oqalussinnaatitaasimannginnerata isumassarsitippaanga. Uangalu oqalunnissaannik periarfissikkusutsappakka, Rasmus Lyberth peqataanissaminut qilanaarpoq, naalli nipilersukkani sorliit appinniarnerlugit suli aajanginngikkaluarlugu kalaallisut erinarsorsuaarniarpoq:
- Makkua qanga sananikuusakka ilai nutaanngorlutik takkuttaramik, nutaamik rytmilerlutik takkuttaramik nuannersorujussuanngorlutik. Tamakku ilaassapput aamma. Sorpiaassanersulli suli naluara, Rasmus Lyberth taama oqarpoq.
Rasmus Lyberthip festivaalit assigiinngitsut ukioq manna peqataaffigisussaavai, taava aamma Akisuanerit festivaalimut peqataajartorluni ukiaru nunatsinnukassaaq.
Rasmus Lyberthip nipilersortarnera pillugu radiukkut podcastimik qallunaatut aallakaatitassiarineqarnera festivaalip nittartagaani (www.tf.dk-mi) tusarnaarsinnaavat.
