RAL Aalborgip umiarsualivialu isumaqatigiinngillat
Royal Arctic Line aamma Aalborg Havn oktobarimili 2025-ip tungaanut atuuttussamik nutaamik isumaqatigiissusiorniarlutik isumaqatigiinniarput. Isumaqatigiissut isumaqatigiissummut 2022-imi atorunnaartussamut nangissutaasussaangaluarpoq.
AAMMA ATUARUK RAL-ip Aalborg Havnillu isumaqatigiinniarnerat unittoq
Naallu illuatungeriit sakkortuunik nalunaaruteqartaraluarlutik isumaqarput inernera kukkusuusoq, Aalborg Havnimut pisortaq Claus Holstein KNR-imut oqarpoq.
- Isumaqatiiinniarnerit ajunngissimapput. RAL-ip suniarnera paasilluarnerusimavarput. Februaarilli aallaqqaataanut killiliussaq ajoraluartumik naammassinngilarput.
RAL-ip piumasaqaataasa ilaanut Aalborg Havn eqaatsumik pissuseqarsimasoq Claus Holstein oqarpoq. Taamaattumik RAL-ip isumaqatigiissut 2025-ip tungaanut sivitsorusuppagu nioqqutissat umiarsualivikkoortartut apparujussuarnissaat neqeroorutigisimagaluarparput.
Taassuma saniatigut Aalborg Havn allanik maani saqqummiukkusunngisaminik neqerooruteqarsimagaluarpoq.
- Oqarsinnaangajappunga naaggaarnerat paasisinnaanagu, sutigummi tamatigut eqaatsumik periarsimavugut. Imaassinnaavorli eqaannerput naammassimanngitsoq. Naggataagulli uatsinnut aamma iluanaarutaasussaavoq.
RAL-imit tusagassiuutinut nalunaarummi pisortaq Verner Hammeken allappoq isumaqatigiissuteqarnissaq anguniarlugu suliffeqarfiup RAL oqaloqatigeqqikkusukkaa.
AAMMA ATUARUK Neqeroorutigineqarsinnaasut tamaasa RAL-imut neqeroorutigaagut
Claus Holsteinili oqarpoq isumaqatiigiinniaqqinnissami RAL-ip nammineq suliniutai kisiisa takorusullugit.
- RAL isumaqatigaara, Verner Hammekenillu isumaqatiginninniaqqinnissamut periarfissaqarneranik oqarnera nuannaarutigaara. Taannaavorli iliuuseqartussaq. Arlaannillu nutaamik nassataqassaaq. Una isumaqatiginninnissamut piginnaatitaanerput atorlugu isumaqatiginninniarunnaareerpugut.
RAL-ip Aalborg 2019-imi qimareerniarlugu siusinnerusukkut nalunaarutigaa. Nalunaarulli taanna inaarutaasumik isumaqatiginninniarnerni oqaloqatigiissutigineqanngilaq.
RAL-ip Aalborg Havn qimappagu, 40 millionit koruuninik nalilimmik annaasaqaataasinnaasoq, Aalborg Havnip siusinnerusukkut nalunaarutigaa.