Aalborgip umiarsualivia: Neqeroorutigineqarsinnaasut tamaasa RAL-imut neqeroorutigaagut

Aalborgip umiarsualiviani pisortaq ugguarpoq RAL-ip suleqatigiinnissamik isumaqatigiissutip nutaap 2022-ip kingorna ingerlatiinnarusunngimmagu.- Naaggaarnerat paasisinnaanngilara, pisortaq Claus Holstein oqarpoq.

Royal Arctic Line aamma Aalborg Havn oktobarimili 2025-ip tungaanut atuuttussamik nutaamik isumaqatigiissusiorniarlutik isumaqatigiinniarput. Isumaqatigiissut isumaqatigiissummut 2022-imi atorunnaartussamut nangissutaasussaagaluarpoq. Naallu illuatungeriit sakkortuunik nalunaaruteqartaraluarlutik isumaqarput inernera kukkusuusoq, Aalborg Havnimut pisortaq Claus Holstein KNR-imut oqarpoq.

- Isumaqatigiinniarnerit ajunngissimapput. RAL-ip suniarnera paasilluarnerusimavarput. Februaarilli aallaqqaataanut killiliussaq ajoraluartumik naammassinngilarput.

AAMMA ATUARUK RAL-ip Aalborg Havnillu isumaqatigiinniarnerat unittoq

'Eqaatsumik periarsimavugut'

RAL-ip piumasaqaataasa ilaanut Aalborg Havn eqaatsumik pissuseqarsimasoq Claus Holstein oqarpoq. Taamaattumik RAL-ip isumaqatigiissut 2025-ip tungaanut sivitsorusuppagu nioqqutissat umiarsualivikkoortartut apparujussuarnissaat neqeroorutigisimagaluarparput.

Taassuma saniatigut Aalborg Havn allanik maani saqqummiukkusunngisaminik neqerooruteqarsimagaluarpoq.

AAMMA ATUARUK Borgmesterip Aalborgimut nassiussakinnerulernissaa piareersimaffigaa

- Oqarsinnaangajappunga naaggaarnerat paasisinnaanagu, sutigummi tamatigut eqaatsumik periarsimavugut. Imaassinnaavorli eqaannerput naammassimanngitsoq. Naggataagulli uatsinnut aamma iluanaarutaasussaavoq.

RAL isumaqatigiinniarnernik aallartitsissasoq

RAL-imit tusagassiuutinut nalunaarummi pisortaq Verner Hammeken allappoq  isumaqatigiissuteqarnissaq anguniarlugu suliffeqarfiup RAL oqaloqatigeqqikkusukkaa.

Claus Holsteinili oqarpoq isumaqatigiinniaqqinnissami RAL-ip nammineq suliniutai kisiisa takorusullugit.

- RAL isumaqatigaara, Verner Hammekenillu isumaqatigiinniaqqinnissamut periarfissaqarneranik oqarnera nuannaarutigaara. Taannaavorli iliuuseqartussaq. Arlaannillu nutaamik nassataqassaaq. Una isumaqatiginninnissamut piginnaatitaanerput atorlugu isumaqatigiinniarunnaareerpugut.

AAMMA ATUARUK RAL ajunngitsumik avissaarusuttoq

RAL-ip Aalborg 2019-imi qimareerniarlugu siusinnerusukkut nalunaarutigaa. Nalunaarulli taanna inaarutaasumik isumaqatiginninniarnerni oqaloqatigiissutigineqanngilaq.

RAL-ip Aalborg Havn qimappagu, 40 millionit koruuninik nalilimmik annaasaqaataasinnaasoq, Aalborg Havnip siusinnerusukkut nalunaarutigaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat