RAL-ip Aalborg Havnillu isumaqatigiinniarnerat unittoq
Ingerlatseqatigiiffiit tusagassiorfinnut nalunaaruteqarlutik taama paasissutissiipput.
Illuatungeriit ullumikkut isumaqatigiissutigisaat naapertorlugu Royal Arctic Linep (RAL) Aalborgip umiarsualivia Danmarkimi umiarsualivittut angerlartarfittut 2022-p naanissaata tungaanut atortussaavaa.
Isumaqatigiissutillu pineqartup 2019-imi atorunnaarsinnissaa, taarsiullugulu Aarhusip umiarsualiviata atulernissaa kissaatigalugu RAL-ip siornatigut oqaatigisimavaa.
Isumaqatigiissulli nutaanik piumasaqaatitalerlugu 2025-p tungaanut sivitsorneqarnissaa illuatungeriit siorna isumaqatigiinniutigilerpaat.
AAMMA ATUARUK Borgmesterip Aalborgimut nassiussakinnerulernissaa piareersimaffigaa
´Illuatungeriit tamanna isumaqatigiinniutigalugu arlaleriarlutik ataatsimiipput allakkatigullu attaveqaqatigiinneq annertooq aamma pisimalluni’, ingerlatseqatigiiffiillu siulersuisui isumaqatigiissutip akuerinissaanut ippassaq februaarip aallaqqaataata tungaanut periarfissaqarsimapput, Aalborg Havn taama allappoq.
Tamannali Royal Arctic Linep siulersuisuinit itigartitsissutigineqarsimavoq, aamma piffissap isumaqatigiinniarfiusup sivitsorneqarnissaanik Aalborgip umiarsualivia neqerooruteqaraluartoq.
- Isumaqatigiinniarnerup angusaqarfiusinnaasumik ingerlanneqarsinnaasimannginnera Aalborg Havnip ajuusaarutigaa, Aalborg Havn tusagassiorfinnut nalunaarummi taama allappoq.
AAMMA ATUARUK RAL-ip Aalborgip qimannissaanik pileraarutaanut Royal Greenland tapersiisoq
Illuatungeriit sinaakkutissatut nutaamik isumaqatigiissuteqarsinnaasimannginnerat RAL-ip aamma ajuusaarutigaa. Umiarsuaatileqatigiiffiulli iliuusissat pillugit pilersaarutaanut iliuusissaanullu sunniuteqassanngilaq.
- Oqaloqatigiinneq ingerlasoq qularinngilluinnarparput ilorraap tungaanut saatsitsissasoq, taassumalu aalajangissavaa kingusinnerusukkut peqatigiilluta ingerlaqqinnissamut pisariaqartunut pilersaarusiorsinnaanersugut, RAL-imi pisortaaneq Verner Hammeken tusagassiorfinnut nalunaarummi taama oqarpoq.
AAMMA ATUARUK RAL ajunngitsumik avissaarusuttoq
