RAL-ip Aalborgip qimannissaanik pileraarutaanut Royal Greenland tapersiisoq
Nunatsinni ingerlatseqatigiiffiit anginersaata, Royal Greenlandip, Royal Arctic Linep (RAL) Aalborgip Umiarsualiviata atorunnaarnissaanik pilersaarutai tapersersorpai.
Reykjavikkip umiarsualiviata agguaasseqqittarfittut atorneqalernissaa, islandimiullu umiarsuaatileqatigiiffiat Eimskip suleqatigalugu tassanngaanniit nunarsuup sinneranut assartuusseqqinnissaq, Aarhusillu Aalborgimut taarsiullugu Europamut isaavittut atulernissaa RAL-ip pilersaarutigaa.
Tamannalu Royal Greenlandimut naleqquttuusoq, ingerlatseqatigiiffimmi assartugalerinermi pisortaq Michael Riis KNR-imut taama oqarpoq.
- Kalaallit Nunaannit Aalborgimuninnaq nioqqutissanik assartuinissamut periarfissaqarnitsinni, nioqqutigisatta Danmarkikkoorteqqaarnagit nunarsuarmi sullitatsinnut toqqaannartumik nassiunnissaannut periarfissanik nutaanik ammaassisoqarnera pitsaalluinnartutut isigaarput.
AAMMA ATUARUK RAL-ip umiarsuai Aarhusimut tulattalissapput
RAL-ip naatsorsuinerinik takorusuttut
Michael Riisip naliliinera naapertorlugu, nioqqutit Islandikkoortumik siammarterneqarnissaat Royal Greenlandimut piffissamik aningaasanillu sipaaruteqarfiusinnaassaaq.
RAL-illi pilersaarutaanut tapersiineq piumasaqaatitaqarpoq. Royal Greenlandimi RAL-ip assartuussinermut nutaamik aaqqissuussineranut naatsorsuinernik tigussaasunik suli takusaqanngilaq.
- Assartugalerinermut aaqqissuusinermi matumani immikkoortukkuutaat qanoq akeqarnissaannut RAL-ip business caseliornissaa suli amigaatigivarput, taanna atorlugu akilersinnaassanersoq naatsorsorsinnaalissagatsigu. Kiisalu aamma suna akilersinnaassanersoq, Michael Riis taama oqarpoq.
AAMMA ATUARUK Aalborg Havnip RAL pakatsissutigigaa
Aalborgip Umiarsualiviata atorunnaarneratigut Royal Greenlandip illuutini qerititsivik, Jyllandip avannaani suliffeqarfimmit Agri Norcoldimit ingerlanneqartoq matusussaassavaa. Royal Greenland taamaalilluni matusinermigut suliffeqarfinnik nammineq annaasaqassanngilaq.
Nutaamilli illumik qerititsiviliornissaq sivisussaaq, RAL-illu naatsorsukkaminik takutitsinngippat illu qerititsivissaq nutaaq sumut inissinneqassanersoq nalunarpoq.
- Assersuutigalugu taava suliaqarfitsinnut utertittariaqassavarput. Nuummuusinnaavoq. Aamma assersuutigalugu imaassinnaavoq agguaasseqqinnerup Rotterdamimut nuunnissaa toqqaripput, tamatumunngali aningaasartuutissat apeqqutaalluinnassapput, Michael Riis taama oqarpoq.
AAMMA ATUARUK RAL-ip Aalborgimi sulisuisa suliumajunnaarnertik attatiinnaraat
Aalborgip 2019-imi atorunnaarnera siusippallaassasoq
RAL-ip qanoq aalajangernissaa Royal Greenlandimut apeqqutaalluinnassasoq nassuerutigaa.
RAL-ip pisortaanerata Verner Hammekenip siornatigut oqaatigaa RAL-ip Aalborg 2019-imi juunip qaammataani atorunnaarusukkaa. Taamatullu pisoqassagaluarpat Royal Greenlandip nioqqutissaatini Aarhusimit Aalborgimi qerititsivimminut assartortariaqassavai, Aarhusimi illuni qerititsivinni pioreersuni inissat amigaatigineqarmata.
AAMMA ATUARUK RAL-ip taarseeqqusinissamik siorasaarisut isumaqatiginniarumagai
Taamatullu assartuusseqqinnissaq ingerlatseqatigiiffimmut aningaasartuutaassaaq - taamatullu aamma piginnittunut Namminersorlutik Oqartussat, imaluunniit atuisartunut. Taamaammat Royal Greenlandip inassutigaa RAL-ip Aalborgimik atuiunnaarnissani tuaviuutissanngikkaa, assartugalerinermi pisortaq taama oqarpoq.
- Attaveqaatini nutaani pissutsit taakkulu qanoq akeqarnissaat paasigutsigu, oqartoqarsinnaalissaaq: Sumiiffinni ataasiakkaani illumik qerititsiviliornissaq qanoq sivisutigissava? Taamaammat ilimagaara ukiunik marlussunnik sioqqutsilluni taamaaliornissaq pitsaasuussaasoq.
RAL-ip Aalborg Havn A/S-imut isumaqatigiissutaa 2022-p tungaanut atuuppoq.
