Aalborg Havnip RAL pakatsissutigigaa
Aalborg Havn A/S-imi siulersuisuni siulittaasoq Aalborgimilu borgmesteri, Thomas Kastrup-Larsen, KNR-imut taama oqarpoq.
Aalborg Havnimmi RAL-illu suleqatigiinnerup ingerlaqqinnissaa pillugu isumaqatigiinniarnerit qanittumut allaat ingerlassimagaluarpaat.
- Tusagaq pakatsinartupilussuuvoq. Royal Arctic Line niuernikkut 2022-p tungaanut isumaqatigiissuteqarfigaarput. Taamatullu isumaqatigiissuteqarnerput Aalborg Havnimi naammassiniarlugu annertuupilussuarmik aningaasaliiffigisimavarput, Thomas Kastrup-Larsen taama oqarpoq.
AAMMA ATUARUK Aalborg Havn vil tilpasse sig RALs behov
Illuatungeriit 2022-p tungaanut atuuttussamik isumaqatigiissuteqarput. RAL-imili pisortaqatigiit isumaqatigiissutaasup siusinnerusukkut atorunnaarsinnissaanik kissaateqarlutik ukiup aappaa avillugu matuma siorna nalunaarutigisimavaat.
Tamannalu pissutigalugu Aalborg Havnimi pisortaqatigiit RAL-ip suleqatigiinnarnissaa siunertaralugu Aalborgip umiarsualiviani aningaasalersuinissaq piareersimaffigalugu nalunaarutigisimavaat.
- Isumaqatigiissuteqaraannimi, tamannalu atsioqatigiissutigalugu, taava aamma isumaqatigiissut eqquutitinniarneqartussaavoq. Imaanngilarmi ullormit ullormut oqartoqarsinnaasoq: ‘Ah, isumaqatigiissut atuukkunnaaginnarpoq’. Aap, ilimasaarneqareerpugut. Maaniiginnarnissaanulli (RAL-ip, aaqq.), aamma 2022-p kingorna, suut naammassineqassanersut piffissap ingerlanerani oqaloqatigiissutigisimavarput.
RAL-ip isumaqatigiissut atorunnaarsissappagu 200 millionit koruuninik taarsiiffigineqarnissamik piumasaqaateqarniarluni Aalborg Havn A/S-ip sioorasaarutigisimavaa.
Aalborg Havnimi quersuarmut nutaamut containerinillu inissiisarfiup allileriffigineqarnissaanut millioninik pingasunik kisitsisitalinnik aningaasaliisimavoq. Aalborg Havnillu piumasaqaateqarnissani aalajangiusimavaa.
- Piumasaqaatissatta nassiutinnginnerani naatsorsueqqissaagut. Taarsiivigineqarnissamilli piumasaqaatissarput taama annertutigissaaq. Aamma isumaqarpunga tamanna Royal Arctic Linemit eqqarsaatigilluarneqartariaqartoq, Thomas Kastrup-Larsen taama oqarpoq.
Royal Arctic Linep Aalborg Danmarkimi umiarsualivittut pingaarnertut 1971-imiilli atulerpaa, umiarsualiviullu kaaviiaartitaani 15 procentinik ullumikkut naleqartoq, siulersuisut siulittaasuata ilisimatitsissutigaa.
