Aalborgip umiarsualiviata Royal Arctic Line tatiniarsarigaa
Royal Arctic Linep Aalborgip umiarsualivianik aallaavittut umiarsualiveqarnissamik isumaqatigiissut 2022-p tungaanut atuuttussatut atsiugaq taamatinniarunnaanngippassuk, umiarsuaatileqatigiiffik 200 millionit koruuninik taarseeqqusissuteqaqquneqarsinnaanera siunnersortimik kisissimagaat, Aalborgip umiarsualivia tusagassiuutinut nalunaaruteqarpoq.
Royal Arctic Line nammineq aalajangiisussaasuuguni Aalborgip umiarsuarlivia 2019-ip qeqqaniit atorunnaassagaa, suliffeqarfiup pisortaanerata, Verner Hammekenip, ippassaq sisamanngornermi KNR-imut uppernarsarpaa.
Taanna naapertorlugu RAL-ip Aalborgip umiarsualivia aaqqiissuteqarniarluni maanna oqaloqatiginiarsarivaa.
Tamannali Aalborgip umiarsualiviata siulersuisuisa siulittaasuata aamma Aalborgip borgmesteriata Thomas Kastrup Larsenip, ilasseranngilaa.
Royal Arctic Linep Aalborg aallaavittut 2022-p tungaanut umiarsualivigissagaa pituttorneqarsimasumik isumaqatigiissuteqartoq, borgmesteri tusagassiuutinut allappoq.
- Taamaammallu piffissaaliussap iluani nutaanik isumaqatigiissusiorusunngilagut. Isumaqatigiissut isumaqatigiissutaavoq, Thomas Kastrup Larsen oqarpoq.
