Umiarsualivissuaq RAL-imut naleqqussarumasoq
Umiarsualivissuup pisortaa, Claus Holstein, Aalborgip Umiarsualivissuata Royal Arctic Linellu siunissaat oqaloqatigiissutigiartorlugit sapaatip akunnerani matumani Nuummiippoq.
Islandimimeersoq Eimskipip Royal Arctic Linellu suleqatigiilerneranni nassiunniarneqartut amerlinissaat naatsorsuutigineqarpoq, Aalborgimilu containeriisiviup taakkuninnga suliaqarsinnaanissaanut siunnersuutit arlallit saqqummiunneqartut, Aalborg Havnimit oqaatigineqarpoq.
Royal Arctic Linep umiarsuariligassaanik sullissisinnaajumalluni kranersuarnik marlunnik pisinissamik umiarsulivissuaq takorluugaqarpoq.
Pisortap Claus Holsteinip siunissamut suna naatsorsuutiginerlugu KNR-imut itisilerumanngilaa.
Umiarsuaatileqatigiiffiup Aalborgip Umiarsualivissuanut 2019-imi pituttoqqajunnaanissaa kissaatigalugu, tassungalu taarsiullugu Aarhusip Umiarsualivissua atulerusullugu, Royal Arctic Linep pisortaata, Verner Hammekenip, sapaatip akunnerata ingerlanerani oqaatigaa.
Royal Arctic Line Aalborgillu Umiarsualivissua ukioq 2022 tikillugu isumaqatigiissuteqarput.
