Politiit raajanik aalisapiluttoqarsimaneranik sivisuumik peqqissaartumillu misissueqqissaarnerat maanna qaangiuppoq – annerusumik unioqqutitsisoqarsimanngilaq.
Nunatsinni politiit siorna raajanik aalisapiluttoqarsimanera pillugu annertuumik misissueqqissaarnissartik aallartippaat – tamatumunnga patsisaavoq nalunaarusiaq, kilisaatit avataasiortut annertuumik aalisapilunnerarlugit pisuutitsisoq.
Politiillu peqqissaarluinnarlutik misissuillutik aallartipput – ilaatigut danskit naalagaaffiata aningaasatigut peqquserluttoqartillugu unnerluussisorisartagaat – politiit misissueqqissaartartuisut ilisimaneqarnerusut – misissueqqissaarnermi peqataatinneqarlutik. Misissueqqissaarnerullu nalaani kilisaatinut pakasaalluni annertuumik misissuisoqartarpoq – ilaatigut Nuummi aamma Danmarkimi Hanstholmimi.
Maanna suliaq naammassineqareerpoq, taama ilisimatitsivoq nunatsinni politimesteri Steen Silberg Thomsen.
Aalisapiluttoqarneranik nalunaarusiap pisuutitsineri uppernarsaatissaqanngitsut paasineqarpoq.
Unnerluussinerit marluk taamaatinnerisigut suliaq naammassineqarpoq – suliassani marlussunni aalisarnermut inatsimmik minnerusumik unioqqutitsisoqarsimavoq – unioqqutitsinerilli ima annikitsigipput, eqqartuussisulersuussinissaq pisariaqartutut isigineqarani – unnerluussinissamik taamaatitsinerit siunissami aalisarnermut inatsisip malinneqarnissaanik mianersoqqusinermik oqariartuuteqarput.
Aalisariutaatillit allat nalunaarusiami taaneqartut politiinit iliuuseqarfigineqassanngillat – tassami politiit misissueqqissaartartuinit imaluunniit nunatsinni politiinit inatsisinik unioqqutitsisimasutut naassaarfigineqanngimmata, politimester Steen Silberg Thomsen oqarpoq.
