Qisutoqaq sanaartornermi atoqqitassanngortinneqartoq
Nuummi Inuunerissaaviup Steno-p Kalaallit Nunaanni illussaa qisuit sinnikkut atorlugit misileraataasumik sanaartorniarneqarpoq.
Suliniut misiliutaasumik taaneqartoq, Ineqarnermut Attaveqaasersuutinullu Naalakkersuisoqarfiup saqqummiuppaa, Hans Peter Poulsenilu KNR-mut ima oqaaseqarpoq:
- Suliniut suliffeqarfimmit namminerisamik aallartinneqarpoq. Naalakkersuisut isumaqarput, isumassarsialatsialaammat nangeqqitassaalluartoq, nunamilu maani suliani angisuuni siammarterneqarsinnaasoq, taanna oqarpoq.
Kalaallit Nunaanni atoqqiisoqarpiarneq ajorpoq. Tamannalu avatangiisimut iluaqutaanngilaq. Taamaattumik Hans Peter Poulsenip neriuutigaa, misiliutaasumik suliniuteqarneq allanit isumassarsiorfiulluassasoq, taamaaliornikkut nunarsuatsinnut aningaasarsiornikkullu sutigut tamatigut iluaqutaaniasssammat.
- Atortunik eqqaallaqqissorujussuuvugut suliniutinut allanut atoqqinneqarluarsinnaagaluartunik. Avatangiiserput innarlerumanagu iliuuseqarfigissavarput, taanna oqarpoq nangillunilu:
- Kattuffinnut tamanna sipaarutaassaaq, sanaartornermummi atatillugu atortussanut nutaanut tamakkiisumik akilinnut akiliisinnaanngitsunut iluaqutaassammat. Atoqqinermi atortussanut akikinnerusunik pisinissamut periarfissaqalersitsissaaq, taanna oqarpoq.
Mingutsitsinngitsoq siunertagissaartorlu
STARKip QISUNNIK ATUEQQINNERMIK misiliummik suliniuteqarnera Qallunaat Nunaannit isumassarsiaavoq. QISUNNIK ATUEQQINNERMI siunnertarineqarpoq, sanaartorfinni qisuit sinneruttut igitassanngortinneqarsimasut ikilisinnissaat, taamaammat sanaartornermi qisuit sinneruttut katersorneqartarput, salinneqartarput tuniniaqqinneqartarlutillu.
Misiliummik suliniuteqarnermi sanaartorfimmi katersivissamik ilisoqarsimavoq, sanaartornermi qisuit sinneruttut tassani katersorneqarlutik. Tamatuma kingorna qisuit suleqatigisanut ingerlateqqinneqarsinnaapput. Taamatut suliniuteqarnermi siunertaavoq, qisuit sannavinnut, paaqqinnittarfinnut atuarfinnulluunniit sammisassaqartitsinermi qisunnik atuisinnaasunut ingerlateqqinneqarnissaat.
Massakkut misiliummik suliniutigineqartoq kisiartatuaavoq. Hans Peter Poulsenilli neriuutigaa, qisunnik atoqqiinermi misilittagaalersussat sanaartornermi avatangiisinut akornutaanngitsumik aqqutaasinnaassasut:
- Allat aallartereermata isumaqarpugut ajunngilluinnartoq. Kalaallit Nunaanni atoqqiisarneq pillugu pitsaasumik ilisilersukkamik siumut isigaluta suleriaaseqarnissarput kissaatigaarput, taamaalilluni periarfissanik atorluaasoqarniassammat, oqarpoq nangillunilu:
- Taamaalilluta atortussat ataasiaannarlugit atoriarlugit igiinnarneqarneqartartut annikillissapput. Atortussat nunatsinnut eqqussorneqartut atoqqiinitsigut atorluarnerusinnaassavaagut, taanna oqarpoq.
