Nuummi atornikuerniarfiit ilaat avatangiisit pillugit suliniutinut nersornaasiuttakkamut innersuunneqartoq
Nunat Avannarliit Siunnersuisoqatigiiffiata avatangiisit pillugit suliniutinut nersornaasiuttagaannut 2023-mi innersuunneqartut aqqi saqqummiunneqarput.
Nuummi atornikuerniarfiit ilaat, Pikumini, innersuunneqartunut ilaavoq. Pikumini inuit atorunnaakkanik tuniniaatitsisut iluanaaruteqaqatigalugit nunatsinni atornikuerniarfinni siullerpaavoq.
Pikuminimik piginnittoq, Nivé Lynge Biilmann, nunarsuarmik eriaginninnissamik akisussaassuseqarnissaq pillugu anguniagaqallaqqeqisoq, Nunat Avannarliit Siunnersuisoqatigiiffiat nalunaarummini allappoq. Taakku avatangiisit pillugit suliniutinut nersornaasiinissaminnut innersuunneqartut ilanngullugit nalunaarutigaat.
Atornikuerniarfik Pikumini atoqqitanik atukkersornerup orniginartuunngitsutut ingammik inuusuit akornanni isigineqarunnaarluni torragineqaleraluttuinnarneranut peqqutaasoq, Nunat Avannarliit Siunnersuisoqatigiiffiat Pikumini pillugu ilaatigut taama allappoq.
Nuummi atornikuerniarfituaanngitsoq, asseqanngitsorli
Soorliuna Pikumini Nuummi atornikuerniarfituaanngikkaluartoq avatangiisit pillugit suliniutinut nersornaasiuttakkamut innersuunneqartussatut piukkunneqartoq?
Pikumini Nuummi atornikuerniarfinni siullerpaajunngilaq, inuilli atorunnaakkanik tuniniaatitsisut iluanaaruteqaqatigalugit nunatsinni atornikuerniarfinni siullerpaavoq. Tamannarpiarlu Røde Korsiminngarnit allaassutigigaa, Nunat Avannarliit Siunnersuisoqatigiiffiat allappoq.
Røde Korsip inuit tunissutaannik atornikuerniarfiunini kajumissutsimillu ikiuuttunik sulisoqarnini Pikuminiminngarnit allaassutigigaa, Nunat Avannarliit Siunnersuisoqatigiiffiat KNR-imut allappoq.
Pikuminip nunatsinni ukiuni hunnorujulikkuutaani ileqqooreersumik, tassa atoqqiineruleqqinnissamik atorluaaneruleqqinnissamik eqeersaaqqittutulli illuni atornikuerniartuunera tunngavigalugu nersornaaserneqartussatut innersuussaminnut ilanngukkitsik, Nunat Avannarliit Siunnersuisoqatigiiffiat allappoq.
Pikumini nersornaaserneqartuussanersoq oktobarip naanerani paasinarsissaaq.
