Pimmatiginninneq pillugu ilisimatusartoq: Kalaallit Nunaanni pimmatiginninneq imminut toqunnernut attuumassuteqarpoq
Nunatsinni aqagu arfininngornermi unnuk kulturisiorfiussaaq. Unnuk kulturisiorfimmilu peqatigiiffik Tamattaasa (Pimmatiginninneq akiorniarlugu peqatigiiffik) kikkunnut tamanut ataatsiniit matunik ammatitsissaaq, tassanilu NUIF-imi ingerlanneqartumi qinngasaarunnermut misigisanik oqaluttuartoqarsinnaassalluni.
Pimmatiginnttarnermut ilisimatusartoq Helle Rabøl Hansen siunnersuinissamut periarfissaqartitsilluni aamma peqataassaaq.
AAMMA ATUARUK Unnuk kulturisiorfik ukiuni marlunni aaqqissuunneqanngereerluni aaqqissuunneqartussanngortoq
Helle Rabøl Hansen namminersortutut atuarfimmut – inuusuttunullu ilisimatusartuuvoq, taassumalu pimmatiginninneq inuusuttullu atugaat pillugit ilisimatusarfinikuuai. Taannalu Ilinniartitaanermut Aqutsisoqarfik nuna tamakkerlugu pimmatiginninneq akiorniarlugu periusissamut nutaamut siunnersuiartorluni nunatsinniippoq.
- Maaniippunga pissutigalugu Namminersorlutik Oqartussat aperisimammanga Nuna tamakkerlugu pimmatiginninneq akiorniarlugu periusissaq nutaaq pillugu siunnersuiartorsinnaanersunga. Suliffeqarfiillu pimmatiginninneq pillugu ilisimasannik avitseqateqarusunnersunga soqutigilluarpaat. Tassunga atatillugu peqatigiiffik Tamattaasa aamma suleqatigaara, Helle Rabøl oqarpoq.
Kalaallit Nunaanni pimmatiginninneq annertusoq
Helle Rabøl Hansen nunatsinni suleqatinilu piffinni assigiinngitsuni pimmatiginninneq pillugu misissuinikuupput.
- Kalaallit Nunaanni pimmatiginninneq annertoorujussuuvoq. Atuarfinni pimmaginnittoqangaatsiarnera erseqqissassallugu immaqa pingaaruteqarpoq. Taamaammat suliassaqarpoq, Helle Rabøl Hansen oqarpoq.
Helle Rabøl Hansen naapertorlugu assigiinngitsutigut pimmatiginnittoqarsinnaavoq. Assersuutigalugu oqalunnermi pimmatiginnittoqarsinnaavoq, tassa timi atorlugu digitalikkullu pimmatiginnittoqarsinnaalluni. Digitalikkullu pimmatiginninneq eqqumaffigineqartariaqartoq taassuma oqaatigaa.
- Pissutigalugu taanna nipeqanngimmat maluginngitsoorsinnaasaratsigu. Kisianni oqalulluni pimmatiginninertut aseruisinnaatigaaq.
AAMMA ATUARUK Erla qinngasaarneqartarsimasumik ernutalik peqatigiiffiliortoq
Pimmatiginninnermut ilisimatusartup nunatsinni digitalikkut pimmatiginninneq siammasinnerarpaa.
- Oqarsinnaavunga qarasaasiatigut pimmatiginninneq siammasissorujussuuvoq, pissutigalugu atuarnerup sulinerullu avataatigut pimmatiginnittoqarsinnaammat, tassanilu illoqarfiit nunaqarfiillu kimorlugit aamma pimmatiginnittoqarsinnaavoq. Oqaatigisinnaavaralu nipeqanngitsumik pimmatiginninneq piffinni arlalinni aamma atugaasoq.
Tamattaasa pillugu:
- Pimmatiginninneq akiorniarlugu peqatigiiffik Tamattaasa 2022-imi juulimi pilersinneqarpoq.
- Peqatigiiffiup siullertut siunertaraa naalagaaffeqatigut qanoq iliortarnerannik isumassarsiorfigissallugit, naggueqatigullu Inuit qanoq iliortarnersut, aamma nunarsuup sinnerani qinngasaaruttarneq pillugu qanoq iliuuseqartarnersut isumassarsiorfiginissaat.
- Erla Vinther peqatigiiffik pilersippaa, pissutigalugu ernuttami pimmatigineqareernerata kingorna saaffissaarukkami.
- Tamattaasa unnuk kulturisiorfimmi NUIF-immi matut ataatsinut kikkunnulluunniit ammassavaat.
Helle Rabøl Hansenip nunatsinni imminut toqunneq ilaatigut pimmatiginninnermik pissuteqarsinnaasoraa. Pimmatiginninneq inunnut nuanniilliortitsisartoq, inuunerullu naleqassusaa aamma sunnerneqartarluni, imminut tatigineq annaaneqartarpoq. Taamaammat tamanna ilaasa inuunerminnik annaasaqarnerannik kinguneqartarpoq.
- Pimmatiginninnerli imminut toqunnerni tamaniinngilaq, pimmatigineqarsimallutilli imminut toqussimasut amerlasoorujussuupput. Tassanilu takuneqarsinnaasarpoq inup killissavini peqatigiinnermi tikissimagaa, peqatigiinnermilu piffissap sivisuup iluani immikkoortitaasimalluni, Helle Rabøl oqarpoq.
Helle Rabøl Hansenip meeranermi atugarliorsimaneq, imaluunniit asanninneq naalliunnartoq aqqusaarneqarsimasoq peqqutaajuaannanngitsut eqqaamaqquaa. Soorunami isumaqarsinnaavoq, kisianni alaatsimoornermi ilaasinnaatitaanermut aamma sunniuteqartarpoq.
Inuit sapilersissinnaagai
Pimmatiginninnermut ilisimatusartup pimmatigininnerup annikillisarneqarsinnaanissaanut neriuutissaqarsoraa.
- Tamanna upperissagipput malissagippullu pingaaruteqarpoq. Taamaalilluta ileqqutoqqat maliinnarlugit tamanna atugariinnarsinnaassagipput eqqarsassanata, atugariinnarneqarsinnaanngilarmi. Atugariinnassagipput eqqarsaraanni taava inuup sapilersissinnaaneranik akuersisoqaannassaaq.
Helle Rabøl Hansenip pimmatigineqartartut mianersuussassaasorai.
- Pimmatiginninneq pillugu inunnik ataasiakkaanik pisuutitsinnginnissaq pingaaruteqarpoq. Pimmatigineqarsimasullu aamma pisuutinneqassanngilluinnarput. Pimmatiginninnerup peqatigiinnikkut pisarnera paasineqassaaq. Taamaammat tamanna peqatigiilluni suliarineqassaaq.
Taannalu atuarfinni suliffeqarfinniluunniit qanoq iliornissamut malittarisassiortoqarnissaanik aamma kaammattuueqarpoq. Inuimmi namminneq politikkilioqataagaangamik namminneq siunnersuutigisaminnik malitsisinnaanerusartut taassuma oqaatigaa.
- Pingaartumik atuarfinni atuartut peqataatinnerisigut pimmatiginninneq akiorniarlugu politikkiliortoqarnissaa kaammattuutigerusuppara, suliffeqarfinnilu sulisunik aamma peqataatitsinikkut
Ilisimatusartoq aqagu arfininngornermi NUIF-imi naapinneqarsinnaavoq. KNR TV aamma Radio marluniik tallimat tungaanut aamma alakkarneqarsinnaassapput.
