Erla qinngasaarneqartarsimasumik ernutalik peqatigiiffiliortoq
- Ajanneqarlungalu issororneqarlunga isimminneqarpunga. Atualeqqaarninni ulloq siulleq qinngasaarneqarama aallartinnerlioqaanga.
Qulingiluanik ukiulik Minik Gunnadal taama oqarpoq.
Minik angajoqqaanilu Sverigemit Nuummut nuukkamik, atuarfittaamini Atuarfik Samuel Kleinschmidtimi aallartinnerliorpoq.
Taanna atualeqqammiinnartoq 2020-mi decembarip 18-iani tujormisinneqareerluni ajutoorsimasoq nakorsiartarfimmukaanneqarpoq.
Miniup aanaava ernguttami angajoqqaavinit tamatuma kingorna sianerfigineqarpoq.
- Ernuttamma angajoqqaavisa ernertik nakuuserfigineqarsimammat ajoqusersimasut nakorsiartarfianniitillutik sianerfigivaannga. Ernutara taamani assut nuanniilliorpoq tilluusarlunilu. Taamaalillunga qinngasaarisarneq akiorniarlugu peqatigiiffiliorniarlunga taamani aalajangerpunga, Erla Vinther oqarpoq.
Erla Vintherip oqarnera naapertorlugu ernutaa sakkortuumik nakuuserfigineqarsimagaluartoq ikiorneqarsinnaasimanngilaq.
- Miniup atuarfia iliuuseqarsinnaasimanngilaq. Kukkuluttortoqarpoq, atuarfiatalu pisoq nalunaarsorsimanngikkaa paasinarsivoq. Qanorluunniit pisoqaraangat pinngitsooratik nalunaarsuisussaatitaapput. Tamannalu sukateriffigineqarnikuuvoq nalunngilara, taanna oqarpoq.
Erla Vinther: Qanoq aamma taamaattoqassava
Erla taamani naammatsippoq. Taamaalilluni qinngasaarisarneq akiorniarlugu peqatigiiffiliorusuleramili Tamattaasamik taallugu aasaq manna juulimi kiisami pilersippaa.
Erla peqatigiiffimmi tassani siulittaasuuvoq.
- Peqatigiiffiliattulli ittut amigaatigisarakkit pilersippara. Qanoq aamma meerartavut inuusuttavullu ataqatigiinnissamulluunniit ikioqatigiissinnaassanngilagut, Erla Vinther oqarpoq.
Peqatigiiffik "Tamattaasa" piimmatiginninnginnissamut ullormut atorneqassaaq.
- Peqatigiiffiup siullertut siunertaraa naalagaaffeqatigut qanoq iliortarnerannik isumassarsiorfigissallugit, naggueqatigullu Inuit qanoq iliortarnersut, aamma nunarsuup sinnerani qinngasaaruttarneq pillugu qanoq iliuuseqartarnersut isumassarsiorfiginissaat. Ulloq siulleq atualerfimmi qinngasaaruttarnerup akiorneqarnissaanik ulloqartitsisalernissarput, atuartut tamakkerlugit assigiinngitsunik sammisassaqartitsisalernissarput sulissutigissavarput.
- Ilaasortanngortut tupinnaannartumik ilisimasaqaqaat, aamma qinngasaaruttarnermut ilisimasaat annertupput. Qinngasaaruttarnerup unitsinneqarnissaantu qanoq iliornissatsinnut imminut isumassarsiorfigeqatigiippugut.
Minik Stocholmimut nooqqittoq
Minik maanna Sverigemut angajoqqaanilu uteqqereeraluarlutik, peqatigiiffiup “Tamattaasa”-p pilersinneqarsimanera nuannaarutigaa.
- Nuannaarutigiinnarpara peqatigiiffik nutaaq pilersinneqarmat. Aamma allat misigisimasakka misigisariaqanngimmassuk, Minik Gunnadal KNR-mut oqarpoq.
Minik maanna Stocholmimi kammalaatitaartorsimanini nuannaarutigeqalugu aamma oqaluttuarpoq.
- Maani amerlanernik kammattaajortorpunga, aamma nuanneqaaq atuarfik aamma pitsaanerullunilu nuannernerugami.
KNR Atuarfik Samuel Kleinschmidtimi pisimasoq pillugu aqutsisunut oqaaseqartitsiniarami, atuarfiup naalagaa, Margrethe Karlsen Brummerstedt allakkatigut ima akivoq:
"Suliamut tunngatillugu oqaaseqarsinnaanngilanga, kisianni politiit qanimut suleqatigaagut, atorneqarsimasullu uppernarsaataasinnaasut tunniunnikuuagut. Aamma nakkutilliinermut filmiliuummi immiussat tunniunnikuuagut. Suliamut tunngatillugu iliuuseqarfigisinnaasagut tamaasa iliuuseraagut".