Unnuk kulturisiorfik ukiuni marlunni aaqqissuunneqanngereerluni aaqqissuunneqartussanngortoq
Coronap nunarsuaq tamakkerlugu tuniluunnera pissutigalugu ukiuni marlunni unnummi kulturisiortoqanngereerluni januaarip 21-ani arfininngornermi aaqqissuunneqaqqittussanngorpoq.
Nunatta Atuagaateqarfia pisarneq malillugu aaqqissuussisuussaaq.
- Pilerisorujussuuvugut isikkunikkiartulermallu qilanaalerluta, qanillileraangat aatsaat pilersaarutit isikkunikkiartulertaramik, Nunatta atuagaateqarfiani pisortaq Elisa Petersen KNR-mut oqarpoq.
AAMMA ATUARUK Unnuk Kulturisiorfik 2022 taamaatinneqartoq
Suliffeqarfiit assigiinngitsorpassuit pulaarneqarsinnaassapput – assersuutigalugu Pinngortitaleriffik ilaqutariit tamarmiullutik assigiinngitsorpassuarnik misigisaqarfigisinnaasaannik tamanut ammasumik aaqqissuussissaaq.
Aamma kigutileriffik imaluunniit Naviair mittarfeqarfiit peqatigalugit nunatsinni silaannarmi nakkutilliisoq pulaarneqarsinnaassapput.
Unnuk kulturisiorfimmi sinerissami aamma pulaagassaqassaaq. Assersuutigalugu Ilulissani, Qasigiannguani, Paamiuni aamma Narsami Royal Artic Line pulaarneqarsinnaavoq. Maniitsumi Ilulissanilu Jehovap nalunaajaasui pulaarneqarsinnaassallutik.
Suliffeqarfinnit tikilluaqquaqqusinissamut eqqarsaateqaruit suli periarfissaqarputit.
- Tassa peqataakutsoorsinnaapput, killeqanngilagut nittartakkamut immersorusutatik immersuinnassavaat nalornissagunillu aperiinnarsinnaapput. Kikkulluunniit pisarnermittut tikilluaqqusaapput imatut immikkut piumasaqaateqanngilagut, Elisa Petersen oqarpoq.
AAMMA ATUARUK Ulloq unnuarlu iputtuusaarluni tapersersuiniartoq: Paasileratallarpara unamminassaqisoq
Unnuk Kulturisiorfik siullermik 2001-imi aaqqissuunneqarpoq, Nunatta Atuagaateqarfialu ukiut tamaasa aaqqissuussisuusarpoq.
