Ulloq unnuarlu iputtuusaarluni tapersersuiniartoq: Paasileratallarpara unamminassaqisoq
Patrick Abrahamsen Nuummi timigissartarfimmi Fitness.gl-imi unnuk kulturisiorfimmi jannuarip ulluisa 21-anni akunnerit 24-it atorlugit iputtuusaassaq.
Patrickip tamanna anguniarpaa, timigissartarfimmi ukioq ataaseq inorlugu iputtuusaarluni sungiusareerluni. Siullermik iputtuusaarluni halv maratonerpoq tamatuma kingorna maratonerpoq, kingornalu arlaanninngaannit tusarpaa, ulloq unnuarlu iputtuusaartoqarsimasoq.
- Sapaatit akunnera ataaseq marlulluunniit eqqarsaatigereerlugu misilinniarlugu aalajangerpunga. Taama ajornartiginavianngilaq. Ukioq ataaseq qaangiuppoq misilinniarlugu eqqarsaatigilerakku ukiullu ataatsip ingerlanerani misilinniarlugu aalajangerpunga, Patrick Abrahamsen Narsarsarsuarmiittoq oqarasuaatikkut oqaloqatigaarput.
Patrick Abrahamsen timmisartuutileqatigiiffiup Air Greenlandip anaassinniartartuini sulisarpoq.
Iputtuusaarluni suliniut kisimi suliniutigaa, neriulluni Tasiilarmiunut iluaqutaajumaartoq. Patrick Abrahamsen Tasiilaminngaaneersuuvoq.
Iputtuusaarnerani kilometerisut ataatsitut isorartutigisumik iputtuusaarnerani suliffeqarfik imaluunniit suliffeqarfiit kilomerimut ataatsimut aningaasaliinissaat anguiagaavoq.
Suliffeqarfik ataaserluunnniit aningaaaliinissamik suli nalunaaruteqartoqarsimanngikkaluartoq, Patrick Abrahamsen neriuuteqarluartorujussuuvoq.
Inuusuttunut suliniummut tunniussaqarniartoq
Aningaasat Tasiilami suliniummut Siu-Tsiumut tunniunneqassapput, suliniummi tassani inuussuttut ilinniagaqaratillu suliffeqanngitsut ilinniagaqalernissaannut suliffeqalernissaannullu sungiusartinneqartarput.
- Tasiilami inuusuttut meeqqat atuarfianni atuareerlutik ingerlariaqqissimannngitsut arlaqarput, taakkualu susassaaleqipput, taakkualu ileqqorissaarnissamut ajunngitsumullu ingerlariaqqinnissaannut tapersersorneqarnissaat pisariaqarpoq, suliniummilu Siu-Tsiumi taamakkua anguniarneqarput, Patrick Abrahamsen ulloq unnuarlu iputtuusaarluni tapersersuiniartoq oqarpoq.
Patrick Abrahamsen timigissartarfimmi Nuummiittumi Fitness.gl-imi unnuk kulturisiornermi januaarip ulluisa 21-anni iputtuusaartoq takuneqarsinnaajumaarpoq.
AAMMA ATUARUK Unnuk Kulturisiorfik 2022 taamaatinneqartoq
Unnuk kulturisiornissap tungaanut Patrick Abrahamsen ullup unnuallu ataatsip ingerlanerani 150 kilometerisut 200 kilometerisullu isorartutigisumik sungiusarniarpoq. Patrick kingullermik rekortiliivoq decemberip qaammataani tassani akunnerit aqqaneq marluk atorlugit iputtuusaarpoq, unnukkut arfineq pingasunut aallartikkami aqaguani ullaakkut arfineq pingasut tungaanut.
Patrick Abrahamsen unnuk kulturisiorfimmi iputtoq takorusukkaanni Nuummi Fitness.gl-imi illoqarfiup qeqqaniittumi alakkarneqarsinnaavoq, nittartakkakkullu aamma malinnaavigineqarsinnaalluni.
Siorna unnuk kulturisiornissaagaluaq corona pissutigalugu taamaatippoq.
