Qimarnguimmik Tasiilami pilersitsisoqalerpoq
Siumut sinnerlugu Inatsisartuni ilaasortaq Laura Tàunâjik taama isumaqarpoq, naalakkersuisullu qimarnguimmik Tasiilami pilersitsinissamik Kommuneqarfik Sermersuumut saaffiginneqqullugit peqquneqarnissaannik siunnersuummik Inatsisartut upernaakkut ataatsimiinnissaanni siunnersuuteqarluni.
Nunatsinni arfineq-marlunnik qimarngueqartoq, arlaannaalluunniillu Tunumi inissisimanngitsoq Laura Tàunâjiip tikkuartorpaa.
Tunumi qimarnguimmik atorfissaqartitsisoqarnera annertusoq Tàunâjiip oqaatigaa, politiillu ukiumoortumik kisitsisaataasa takutikkaat Tasiilami angerlarsimaffimmi eqqissiviilliornerit Nunatsinni amerlanerpaat tulliusut, naak illoqarfik Nunatsinni illoqarfinni annersaat arfineq-aapparigaluaraat 2100-nik innuttaqarluni.
Aamma atuaruk Meeqqat inuusuttullu inuuniarnermikkut ajornartorsiortut illersuisoqalissapput
Aamma atuaruk Periuseq nutaaq meeqqanut inuusuttunullu iluaqutaasoq
Tunumi anaanaasut sisamararterutingajaasa timikkut 2008-mi persuttarneqarsimanerat misissuinermi kisitsisit takutikkaat Siumut sinnerlugu Inatsisartuni ilaasortap aamma oqaatigaa, Nuummut sanilliukkaanni marloriaammik amerlanerullutik.
Ukiortaatinnagu piariissaaq
Kommuneqarfik Sermersuup 2016-imut missingersuutaani takuneqarsinnaavoq kommuni qimarnguimmik pilersitsisoqarnissaa pillugu 500.000 koruuninik immikkoortitsisimasoq, ingerlanneqarnissaanullu 800.000 koruuninik immikkoortitsisoqarsimalluni.
Kommuneqarfik Sermersooq Namminersorlutik Oqartussanik suleqateqalereerpoq, qimarnguiullu ukiup massuma naannginnerani pilersinneqarsimanissaa naatsorsuutigineqarluni. Kommuneqarfik Sermersuup tusagassiisartua Lars Damkjær KNR-imut taama oqarpoq.
Inatsisartut upernaakkut ataatsimiinnissaat apriilip ulluisa arfineq-pingajuanni aallartissaaq.