Meeqqat inuusuttullu inuuniarnermikkut ajornartorsiortut illersuisoqalissapput
Tamanna Nuummi meeqqanut aallaqqaammut neqeroorutaassaaq, piffissalli ingerlanerani nunap sinneranut siaruaanneqassalluni.
Meeqqat pisinnaatitaaffii pillugit sullissiviup MIO-p, Peqatigiiffiullu Kalaallit Meerartaasa oqarnerat naapertorlugu kommunit ullumikkut meeqqanik tusaaniartarneq pikkoriffigivallaanngilaat.
- Meeqqat akuutinneqarnerugaangamik, kingorna inissinneqarfimminni atugarissaarnerusarput, Peqatigiiffik Kalaallit Meerartaanni suliniummi aqutsisoq David Randa taama oqarpoq.
Aamma atuaruk Naalakkersuisut kommunit nakkutiginerulerniarpaat
Meeqqat tusaaneqanngitsoortut amerlavallaartut
Nunatsinni meeqqat 1.100-t missaannik amerlassusillit angerlarsimaffiup avataanut inissinneqarsimapput, taakkulu meeqqat tamarmiusut 7 procenteraat.
MIO-p Peqatigiiffiullu Kalaallit Meerartaasa paasissutissiinerat naapertorlugu, meeqqat taakku akornanni amerlasuut suliani imminerminnut tunngasuni qanoq ingerlasoqarnera ilisimanngippallaartarpaat, aalajangiinerillu amerlaqisut meeqqat qulaatiinnarlugit pisarlutik.
Ullumikkut meeqqat inuusuttullu sulianut imminerminnut tunngasunut qanoq akuliutsinneqartarnerat assigiinngitsorujussuuvoq. Inatsisit naapertorlugit meeqqat akuliutsinneqartussaapput, tamatumalu Kalaallit Nunatsinni naammassineqarnissaa peqataaffigerusupparput.
Aamma atuaruk Meeqqat Illersuisuat: Meeqqat pisinnaatitaaffii unioqqutinneqarput
Meeqqat illersuisuisa – Najortikkut – kommunimi suliamik ingerlatsisup meeqqat pitsaanerpaamik inissinneqarnissaannik, taamaalillunilu pitsaanerusumik meeraanermi inuuneqarnissaannik aalajangiinissap qulakkeernissaata saniatigut, suliniut aamma ungasinnerusumik isigisumik siunertaqarpoq.
- Taakku nammineq inuunerminnut tunngasunut aalajangeeqataasarnermik sungiusimasaqarnerat pissutigalugu, meeqqat inersimasutut inuuneranni pitsaanerusumik inuuneqarnissaannut tamanna qulakkeerinneqataajumaartoq neriuutigaarput.
Nunatta sinneranut siammarneqassaaq
Aaqqissuussineq MIO-p Peqatigiiffiullu Kalaallit Meerartaata akornanni suleqatigiinnikkut pilersoq, Oak Foundation Denmarkimit tapersersorneqarpoq, ukiunilu marlunni ineriartortitsinermi suliniutitut ingerlanneqassaaq.
Aallaqqaammut Nuummi meeqqat inuusuttullu kommunimik ataatsimeeqateqarnerminni Najortimik peqateqarnissamik periarfissinneqassapput. Illoqarfiilli amerlanerusut allat tullinnguupput.
- Sivitsunngitsoq Sisimiut Maniitsorlu tullinnguutissapput, Tasiilallu qanittumi aamma tullinnguukkumaarnissaa neriunarpoq. Taamaalillutalu sinerissamut siaruarnissarput sulissutigaarput, matumanili aningaasassaqarnissaq politikikkullu piumassuseqartoqarumaarnera apeqqutaassapput, Peqatigiiffik Kalaallit Meerartaanni suliniummi pisortaq David Randa, taama oqarpoq.
