Naalakkersuisut kommunit nakkutiginerulerniarpaat
Taama oqaluttuarpoq Ilaqutariinnermut, Naligiissitaanermut Isumaginninnermullu Naalakkersuisoq, Martha Lund Olsen.
- Nakkutilliisut suliassaraat kommunini isumaginninnermut suliaqartut inatsisit naapertorlugit suliassatik suliarineraat nakkutigissallugu, Martha Lund Olsen KNR-imut oqarpoq.
Nakkutilliisut suliaasa annertusinerannut 3,6 millionit koruunit immikkoortinneqarput.
Aamma atuaruk Unioqqutitsineq isumaginninnermik sulialinnut attuumassuteqanngitsoq
Nakkutilliisut sulinerat naalakkersuisoqarfiup avataani ingerlassaaq kommunillu meeqqanut inuusuttuaqqanullu sullissinerat nakkutigisassallugu.
- Inatsisit naapertorlugit kommuni pisussaavoq misissuissalluni iliuuseqarlunilu meeraq ikiorserneqarnissaminik pisariaqartitsisoq ikiussallugu, Martha Lund Olsen oqarpoq, nakkutilliisut sulineranni paasineqassaaq meeraq inatsisit naapertorlugit sullinneqarnersoq imaluunniit taama pisoqarsimannginnersoq, Isumaginninnermut Naalakkersuisoq oqarpoq.
Martha Lund Olsen oqarnera naapertorlugu Naalakkersuisut nakkutilliinertik annertusiniarpaat, meeqqat illersuisuata ukiarmi angalanermini nalunaarusiornermini avannaani meeqqat inuusuttuaqqallu sumiginnarneqartarnerat ajornartorsiutaasorujussuusoq nalunaarusiami allaaserineqarmat.
Aamma atuaruk Martha Lund Olsen siunnersuummut akerliunngilaq
Nakkutilliisutut atorfinitsinneqassapput isumaginninnermut siunnersorti, inatsisileritooq aamma aningaasaqarnikkut immikkut ilisimasalik økonomeq.
Nakkutilliisut, kommunimik isumaqatigiissuteqarnikkut imaluunniit kalerreeqqaarani kommunenut misissuiartortassapput.
- Isumaginninnermut Naalakkersuisoqarfiup allaffeqarfianit kommunit ataasiakkat orninneqartalissapput, annertunerusumik misissuiffigineqarlutik, Martha Lund Olsen oqarpoq.
Aamma atuaruk Kommunit nakkutigineqassanersut naalakkersisup misissorai
Nakkutilliisut suliaat annertusineqarpata, kommunit isumaginninnikut sulianik inatsisit unioqqutitsillutik ingerlatsisut sakkortunerusumik iliuuseqarfigineqarnissaannik inatsimmik allannguutissamik Martha Lund Olsen siunnersuuteqassaaq.
- Kommunit ataasiakkaat siusinnerusukkut nakkutilliisunit nalunaarfigineqartut, inatsisit uka naapertorlugit sulissasut taakkualu naapertorlugit iliuuseqanngippata, Naalakkersuisut allannguutissamik siunnersuuteqassapput, kommunit suliassamik naammassinnissinnaanngimmat, isumaginninnermut suliassat Naalakkersuisunit tiguneqarnissaannik, Naalakkersuisunut ilaasortaq Martha Lund Olsen taama oqarpoq.
Inatsisissatut siunnersuut attuumassuteqartunut tusarniaassutigineqarpoq.
Kommunit isumaginninnikkut suliaat Naalakkersuisunit tiguneqarneranni, aningaasartuutigineqartut kommunit akilertassavaat.