Martha Lund Olsen siunnersuummut akerliunngilaq
Siunnersuut taanna ilaqutariinnermut peqqissutsimullu ataatsimiititaliamit tamakkiisumik taperserneqanngilaq. Ataatsimiitsitaliarmi isumaqarpoq susassaqarfimmut tassunga nukiit annertunerusut atorneqartariaqartut.
Tamannalu Martha Lund Olsenip toqqaannaq itigartinngilaa.
- Soorunami ataatsimiititaliap qanoq pisoqartariaqarneranik isumaa tusassallugu soqutigaara. Taamaammallu oqalliseqatiginiarpakka.
- Siunnersortinik pilersitsinerup saniatigut kommunit isumaginninnermut atugassaannik aningaasanik amerlanerusunik immikkoortitsinissat ammaffigaajuk?
- Apeqqutaavoq sunarpiaq pineraat, qanorlu ataqatigiissarneqassanersut, Martha Lund Olsen KNR-imut oqarpoq.
Qaasuitsup aamma Qeqqatalu Kommuniani meeqqat inuusuttullu immikkoortortaqarfiini isumaginninneq pitsaanngitsoq paasineqarmat, ilaqutariinnermut peqqissutsimullu ataatsimiititaliap oqariartuutigaa Kommuneqarfik Sermersooq aammalu Kommuni Kujalleq piaartumik nakkutigineqalernissaa kissaatigalugu.
Tamannalumi Martha Lund Olsenip naalakkersuisoqarfiata misissorlugu aallartereersimavaa.
- Allaffeqarfiga piumaffiginikuuara qanga qanorlu nakkutilliisoqarsimanersoq, kiisalu qaqugu nakkutilliisoqalersinnaanersoq paasiniaqqullugu, Martha Lund Olsen oqarpoq.