Unioqqutitsineq isumaginninnermik sulialinnut attuumassuteqanngitsoq
Tamanna ilaqutariinnermut, Naligiisitaanermut Isumaginninnermullu Naalakkersuisup Martha Lund Olsenip erseqqissarpaa.
- Isumaginninnermik sullissisut kommuniluunniit politiinut tunniussinissaq siunertaralugu attaveqarfiginngilagut. Politiit attaveqarfigineqarsimapput sulianut aalajangersimasunut atasumik, meeqqat sumiginnakkat pillugit taamaaliortarsimavugut, nakuusernerit persortaanerit kinguaassiutitigulluunniit nakuusernerit pillugit politiit oqaloqatigisarpavut, Martha Lund Olsen oqarpoq.
Isumaginninnermik sullissisut kommuniniluunniit politikerit tamakku pillugit apeqqusiinianngilasi?
- Maannakkorpiaanngitsoq.
Inatsisartut Ilaqutariinnermut Peqqinnissamullu ataatsimiititaliaa ataasinngormat pissutsit ajortut pillugit tusagassiuutinut nalunaaruteqaramik ilaatigut allapput:
"Ataatsimiititaliaq paasitinneqarsimasoq, pisuni aalajangersimasuni inatsisinik unioqqutitsisoqartarsimasoq" "ataatsimiititaliallu Naalakkersuisunit paasisimangaa, politiit attaveqarfigineqartarsimasut nalilersinniarlugu Pinerluttulerinermi inatsit unioqqutinneqarsimanersoq".
Sammineqartulli arlaliupput. Politimesterip tullersortaata Morten Nielsenip tamanna erseqqissarpaa.
- Meeqqat inuusuuttullu pillugit isumaginninnermik allaffeqarfinniit pinerluttulerinermi inatsimmik unioqqutitsinerusinnaasunik unnerluutiginninnernik nalunaarutiginninnernillu tigusiuartarpugut. Meeqqat atornerlunneqarsimasut, meeqqat nakuuserfigineqarsimasut allallumi, Morten Nielsen KNR-imut oqarpoq.
Suliarineqarnerinut attuumassuteqanngillat, pineqartunili ataasiakkaani pissutsit pillugit?
- Aap, ilumoorpoq, Morten Nielsen oqarpoq.
Taassuma KNR-imut uppernarsarpaa, ilaqutariinnermut, naligiisitaanermut isumaginninnermullu naalakkersuisoqarfimmiit, atorfimmut atasumik pinerluttulerinermut inatsisimmik sumiginnaasoqarsimaneranut tunngasumik attaveqarfigineqarsimallutik.
- Saaffiginnissut attuumassuteqarpoq, naalakkersuisoqarfiup tungaaniit uppernarsineqarusummat, qaqugukkut pinerluttulerinermut inatsimmut atasumik sumiginnaasoqartarnersoq, Morten Nielsen oqarpoq
Inatsisinilli unioqqutitsinerit tusagassiuutinut nalunaarummi pineqartunut attuumassuteqanngillat.
- Naalakkersuisoqarfillu oqaloqatigiilluarsimavugut, suliassaqartillugu nalunaarutiginninnermi suut piumasaqaataanersut. Uanili nalunaarutiginninnermik tigusaqarsimanngilagut, Morten Nielsen oqarpoq.
Pinerluttulerinermut inatsimmi aalajangersakkat atorfilinnut akisussaaffimmik sumiginnaanernut annertuunut naatsorsuussaapput, taamaattumik inatsit taanna qaqutigorsuaannaq atorneqartarpoq.
Pinerluttulerinermut inatsimmi aalajangersakkat assersuutigalugu aamma kommunini politikerinut atorneqarsinnaapput. Morten Nielsenilu naapertorlugu oqaloqatigiinnermi tamanna aallaaviusimanngilaq:
- Oqaloqatigiinnerit tamatumunnga sammisuusimanngillat, Morten Nielsen oqarpoq.