Kommunit nakkutigineqassanersut naalakkersisup misissorai
Siunnersuut taanna ilaqutariinnermut peqqissutsimullu ataatsimiitsitaliamit naammassangatinneqanngilaq. Ataatsimiitsitaliarmi isumaqarpoq susassaqarfimmut tassunga nukiit amerlanerusut atorneqartariaqartut.
Tamannalu Martha Lund Olsenip tuoqqaannaq itigartinngilaa.
- Soorunami ataatsimiitsitaliap qanoq pisoqartariaqarneranik isumaat tusarusuppara. Taamaammallu oqalliseqatiginiarpakka.
Siunnersortinik angalasartussanik pilersitsinerup saniatigut kommunit isumaginninnermut atugassaannik aningaasanik amerlanerusunik immikkoortitsinissat ammaffigaajuk?
- Apeqqutaavoq sunarpiaq pineraat, qanorlu ataqatigiissarneqassanersut, Martha Lund Olsen KNR-imut oqarpoq.
Qaasuitsup aamma Qeqqatalu Kommuniani meeqqat inuusuttullu isumaginninneq pitsaanngitsoq paasineqarmat, ilaqutariinnermut peqqissutsimullu ataatsimiitsitaliap oqariartuutigaa Kommuneqarfik Sermersmut aammalu Kommuni Kujallermut piaartumik nakkutilliiartortoqartariaqartoq.
Tamannalumi Martha Lund Olsenip naalakkersuisoqarfiata misissorlugu aallartereersimavaa.
- Allaffeqarfiga piumaffiginikuuara qanga qanorlu nakkutilliisoqarsimanersoq, kiisalu qaqugu nakkutilliiartortoqaqqissanersoq misissoqqullugu, Martha Lund Olsen oqarpoq.