Periuseq nutaaq meeqqanut inuusuttunullu iluaqutaasoq

Ilaqutariit pinngitsoqaratik tamarmik nukittuffeqarlutillu nukissaqarput.

Ilaqutariinnik siunersiueqatigiisitsinermi inuk pillugu periuseqarneq Ilaqutariinnermut, Naligiissitaanermut Isumaginninnermullu Naalakkersuisoqarfiup Nunatsinni kommuninut tamanut maannakkut siammarterniarlugu ingerlappaa.  

Meeqqap inuusuttulluunniit peqqissusaa, alliartornera ineriartorneralu aarlerinartumiittut ernumassutigineqarpat, nalinginnaasumik ilaqutariinnik siunersiueqatigiisitsinissamik neqeroortoqartarpoq.

Meeqqap ilaqutaasut allat, ikinngutit inuillu pingaarutillit allat ilaqutariinnit naapinneqartarput. Ilaqutariinnik siunersiueqatigiisitsinermi ilaqutariit attaveqaatigisatik peqatigalugit meeraq inuusuttorluunniit qanoq ikiorneqarsinnaanersoq ikorfartorneqarsinnaasorlu eqqartueqatigiittarput, ataatsimoornissarlu pitinnagu meeraq angajoqqaallu peqatigalugit isumaginninnermut siunnersortip apeqqutit suliarisimasai najoqqutaralugit eqqartueqatigiinneq ingerlasarpoq.

Sullissinissaq tamaat kommunimi atorfeqartitaasumit ataqatigiissaarisutut inissisimatinneqartumit aaqqissuunneqartarpoq, taannalu ilaqutariit ingerlatsiviullu akornanni arlaannaanulluunniit attuumassuteqanngitsutut inissisimasarluni.

Ilaqutariinnik siunersuieqatigiisitsinermik periaaseq Tasiilami iluatsilluartumik misilittarneqarsimavoq.

- Periaatsip nuna tamakkerlugu atorniarneqalernera nuannaarutigaarput, kommunimi ilaqutariinnut pisortaq Tina Dam Rasmussen taama oqarpoq nangillunilu:

- Meeqqanik ilaqutariinnillu mianernartumik inissisimasunik sullitaqarnermi, innuttaasut namminneq tunngavigisaat naapertorlugit ataqqineqartutut peqataatinneqartutullu misigitinneqarnissaat uagutsinnut pingaaruteqarpoq.