Qeqqata Kommuniani meeqqat inuusuttullu akeqanngitsumik timersorsinnaalertut
Qeqqata Kommuniata ilinniartitaanermut ataatsimiititaliaa, meeqqat inuusuttullu timersortaliaarnikkut peqqinnarnerusumik inuusaaseqalernissaannik anguniagaqartoq, taama nalunaaruteqarpoq. Taamaammat Qeqqata Kommuniani kikkulluunniit suli 18-iliinngitsut ukioq mannamiit akeqanngitsumik timersortalersinnaanngussapput.
Qeqqata Kommunia tusagassiuutinut taama ilisimatitsivoq.
AAMMA ATUARUK Ukaleq Slettemark OL-imut legatinnattoq: Isumalerujussuuvoq
Qeqqata Kommuniata timersoqatigiiffiit inuiaqatigiinnut sunniuteqarluarnerannut qujaniarfigerusullugit taakkunani ilaasortaanermut akiliutissat tamaasa akilernerisigut tamanna qulakkiissavaa. Qeqqata Kommunianilu ilaqutariit aningaasaqarniarnerat apeqqutaatinnagit akiliunneqartassapput.
Island taamaaliornissamut isumassarsiviuvoq. Islandimimi pissutsit takutippaat, meeqqat inuusuttullu timersortaliaarsimasut inunnut atassuteqallaqqinnerulersarlutillu peqqinnarnerusumik inuusaaseqalersartut.
Qeqqata Kommunianili pissutsit aamma takutippaat, ilaqutariit timersuutinik assigiinngitsorpaalunnik aallussalinnik meerartallit qitornaasa timersoqatigiiffinni ilaasortaanerannut akissaalatsisarmata, ilaqutariit ilaasa qitornaat timersornermik aallussinissaminnut aporfeqalersartut.
- Ajornartorsiut tamanna qaangissavarput, Qeqqata Kommunia tusagassiuutinut nalunaarummini allappoq.
Inuusuttut tapersersorneqarnertik pillugu ikiuuttassasut
Tapersigaanerli aamma illua tungeqassaaq. Qeqqata Kommuniami tamanna ilutigalugu inuusuttut 14-ileereersimasut unammiuaarnernut pissartanngorniunnernullu peqataallutik angalanermut pisortanit tapiiffigineqartartut inuiaqatigiinni ajunngitsuliorlutik ikiuuttarnisaannut malittarisassaliorpoq.
AAMMA ATUARUK Timersornermik maligassiuisut nersorneqartut
Qeqqata Kommuniani soorlu suliffeqarfiit silataanni aputaajaanikkut, utoqqarnik ikiuinikkut, asimik saligaatsuutitsinikkut allanilluunniit suliaqarnikkut inuiaqatigiinni ajunngitsuliorlutik ikiuuttassapput. Kommunip nalunaarutaa naapertorlugu taamaalillutik inuiaqatigiinni akisussaaffimmik kivitseqataassapput.