Qatserisartut 38-it Danmarkimiit ikiuukkiartussasut
Qatserisartut Danmarkimeersut 38-t sakkutuut timmisartuanut ilaallutik ullumi nunatsinnukassapput.
Taakku Sisimiut Kangerlussuullu akornanni nunap ikuallannerata qamasarnissaannut nunatsinni qatserisartut ikioriartorlugit nunatsinnukarput.
Anoraa sammiviata nikinnerata kingunerani nuna ikuallattoq sapaammi unnukkut ikualaqqilerpoq. Nuna juli aallartilaartorli ikuallalerpoq, kingorna ikuallattup annersaa qaminneqaraluarpoq, nunallu panerpallaarnerata kingorna ikuallattoq qamivinneq ajulerpoq.
Ikuallattorli qaminniarlugu maanna upalungaarsimanermut ataatsimiititaliarsuup Danmarkimi upalungaarsimasunut ikiorneqarnissaminnik noqqaassuteqalerput.
AAMMA ATUARUK Illuaraqarfimmi nunap ikuallannera siaruapiloortoq
Kalaallit Nunat ikiorneqarnissamik kalerriippat Danmarkimiit ikiuukkiartornissat piareersimaffigineqartoq illersornissamut ministeri Trine Bramsen (S) oqarpoq.
- Kalaallit Nunaat ikiorneqarnissaminut kissaateqarpat ikiuunnissarput pingaaruteqartoq uanga isumaqarpunga .
- Naalagaaffeqatigiippugut, taamaattumik Kalaalit Nunaanniit ikioqqusoqarpat pisussaaffeqarpugut naalaarluarnissatsinnik, Ritzauimut oqarpoq.
Kingunerluuteqartorujussuussaaq
Upalungaarsimanermut ataatsimiititaliarsuarmi nunani tamalaani upalungaarsimasut pisortaat Jens Oddershede oqarnera naapertorlugu sakkutuujusussaatitaasut 16-it, namminneq kajumissutsiminnik ikiuuttussat arfineq pingasut upalungaarsimanermut ataatsimiititaliami atorfillillu 14-it iluaqutaalluarnissaat naatsorsuutigaa.
- Nunap ikuallattup siaruaateqqinnginnissaa anguniarlugu ikuallattup killilernissaa annikillisinnissaalu pingaarnertut suliassaraa, taanna oqarpoq.
AAMMA ATUARUK Nunap ikuallannera annertummat Danmarkimiit ikiuukkiartortoqartariaqartoq
Ikuallattoq killilerneqanngippat qaammatinik ukiunilluunniit arlalinnik ikuallattup siaruaattuarnissaa, pinngortitamut uumasunullu ulorianartorsiortitsisinnaammat.
Upalungaarsimanermut ataatsimiititaliap ikuallattup qamisarnissaanut ikiuunnissartik sapaatip akunnerini marlunnik sivisussuseqarnissaa naatsorsuutigaa, suliartortitsinerallu 3 millioner koruuninik naleqarpoq.
Nunap ikuallannerani illuaqqat marluk ikuallapput, inunnillu ajoqusertoqanngilaq.
