Video: Illuaraqarfimmi nunap ikuallannera siaruapiloortoq

Illuaqqiat marluk, Sisimiut avannamut kangiatungaani sananeqaleruttortut, sapaammi unnukkut nungullutik ikuallapput. Siornatigut siaruarnermik taamatut annertutigisumik sukkatigisumillu takunikuunngisatsinnik siuaruarpoq, upalungaarsimasut pisortaat oqarpoq.

Nammineq piumassutsimik qamisaaqataasut qatserisartullu Qeqqata Kommunianeersut, Kommune Qeqertalimmeersut kiisalu Avannaata Kommuunianeersut ataasinngornerup ullaassaani Kangerluarsuk Tullermi nunap ikuallannera, sapaammi unnukkut anorip sammiviata nikereerneratigut, sukkasuumik siaruartoq qamisarpaat.

Kangerluarsuk Tullermi nunami ikuallanneq qatserisartunit sapaat ilanngullugu nakkutigisaasumik qamisarneqarsinnaasimavoq, pisorli sapaammi unnukkut allanngupiloorpoq.

- Ippassaq unnukkut anoraata saqinerani ikuallattoq sukkasoorujussuarmik annertoorujussuanngorpoq siornatigut taamatut annertutigisumik sukkatigisumillu  takunikuunngisatsinnik tassuuguinnaq annertoorujussuanngorami, Qeqqata Kommuniani upalungaarsimanermut pisortaq, Ole Kreutzmann oqarpoq.

AAMMA ATUARUK Nunap ikuallannera annertummat Danmarkimiit ikiuukkiartortoqartariaqartoq

Namminersorlutik Oqartussat sapaammi unnukkut nalunaarutigaat Nunatsinni upalungaarsimanissamut ataatsimiititaliarsuup Danmarkimit qatserisartut 30-it ikiuukkiartornissaat qinnutigalugu saaffiginnissutigisimagaat. Tamatuma saniatigut Sisimiuni qatserisartut nammineq piumassutsimik qamisaaqataasinnaasunik ikiortissarsiorput, Sisimiuniillu nammineq piumassutsimik qamitereqataasussat qulit Kangerluarsuk Tullermut aallartinneqarput.

- Taavalu aamma malitsigiinnarlugit ikiortissagut Avannaata Kommunianiit aamma Kommune Qeqertalimminngaanneertut, inuit katillugit qulit atortullu, aamma malitsigiinnarlugit tikipput, Ole Kreutzmann oqarpoq.

Illuaqqat ulorianartorsiortinneqartut

Qatserisartut illuaraqarfissuarmi Kangerluarsuk Tullermi pilertortumik iliuuseqaraluartut, illuaqqat marluk sananeqaleruttortut nungullutik ikuallapput.

- Sallussaanga oqaruma ulorianartorsiunngillat. Ulorianartorsiorput. Kisianni taakkua illersorniarlugit suliaq massakkut ingerlavoq. Kisianni tassa ajoraluartumik illuaqqiarineqartut marluk - naammassineqanngitsut - ikuallapput, Ole Kreutzmann oqarpoq.

AAMMA ATUARUK Qamikkuminaatsoq: Sisimiut eqqaanni qaqqami ikuallanneq suli ikualavoq

Qeqqata Kommuniani upalungaarsimasuutitat nammineq piumassutsiminnik qamisaaqataanissamut ikiuukkusuttut tullii maanna aallartinniarlugit piareersaleruttorpaat. Nammineq piumassutsimik qamisaaqataarusullutik inuit 20 tungaanut nalunaarsimapput.

Ole Kreutzmannip sisimiormiut qatserisartunut ikiuukkusunnerat qujamasuutigaa. Namminermi piumassutsimik ikiuuttut - qatsereqataarusuttut saniatigut - aamma qatserisartunut  nerisassanik, imeruersaatissanik mamakujunnillu aamma pajuttormata.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat