Nunap ikuallannera annertummat Danmarkimiit ikiuukkiartortoqartariaqartoq
Sisimiut ungasinngisaani nunap ikuallannera peqqutigalugu nunatsinni upalungaarsimanermut ataatsimiititaliarsuaq tallimanngormat ippassarlu sapaammi ataatsimeereerluni, oqartussat Danmarkimut ikiorserneqarnissaq qinnutigalugu saaffiginnipput.
Danmarkimiit ilisimasalinnik marlunnik naliliititsereerlutik, ikuallattup annertuallaarnera peqqutigalugu Danmarkimiit qatserisartut 30-it ikiuukkiartortariaqartut maanna aalajangerneqarpoq.
Naalakkersuisut aalajangerput Upalungaarsimanissamut Ataatsimiititaliap innersuussutaa malinniarlugu. Namminersorlutik oqartussat ikiorserneqarnissamik qinnutaat maanna nassiunneqareerpoq.
Nunap ikuallattup pujuanut tunngatillugu nakorsaaneqarfik kaammattuuteqarluni aamma allappoq.
- Qaqqap ikuallannerani pujoq toqunartuunngilaq, taamaattorli inuit astmaqartut puamikkullu allatigut nappaateqartut sunnerneqarsinnaapput. Pujoq annertooq inoqarfinnut anngutissagaluarpat inuit isersimanissaannik, igalaat matullugit kiisalu silaannarissarfiit matoqqatissagaat, nunatsinni nakorsaaneqarfimmiit kaammattuutigineqartoq, naalakkersuisut nittartagaanni allaqqavoq.