Nutaarmiuni Ikuallattoqarneraniit qaammatit arfineq marluk qaangiuttut: Qatserisartussaaleqisoqaqqittoq

Illu februaarimi ikuallammat angutip 45-nik ukiullip inuunini annaavaa. Taama pisoqareersoq nunaqarfimmi kajumissutsimik qatserisartut pingasut sulilerput. Sulisulli marluk nuuttussanngorput.

Allattoq Thor Bill, Paarnannguaq Nielsen

oktobarip 31-at 2023 15:05

Upernaviup avannaani Nutaarmiuni qatserisartoqarnikkut sillimaniarneq sivisuumi qularnarpoq.

Nutaarmiuni illu ikuallammat angut 45-nik ukiulik ajunaarpoq piffimmilu tassani qatserisartoqanngimmat innuttaasut ikiorfeqaratik isiginnaaginnartariaqarsimavaat. Naak inatsimmi piumasaqaataangaluartoq nunaqarfimmi qatserisartunik qatserutinillu peqarsimanngilaq.Tasiusamilu qatserisartut ikiuukkiartoraluaramik angumersinngitsoorput.

Alianartumik ikuallattoqareersoq Kommune upalungaarsimasullu qisuariarput.

kajumissutsiminnik qatserisartut pingasut atorfinitsinneqalertorput, Avannaata Kommunianilu Kommunalbesytrelsemi ilaasortat qatserutaasiviliortoqassasoq qatserinermilu nutaanik atortusissallutik maajimi aalajangiuppaat.

Aamma atuarukIkuallattoqarnerani ajunaartoq: Nutaarmiuni qatserisartoqaranilu qatseruteqanngilaq

Naak Nutaarmiuni ikuallattoqarnissaanut sillimaniarnerulersimagaluartut, nunaqarfimmi qatserisartussaaleqisoqaqqippoq. Upernavimmi qatserisartoqarfimmi ittuusoq Bjarne Markussen taama oqaluttuarpoq:

- Nutaarmiuni qatserisartut maanna pingasuungallarput. Kisianni sapaatit akunnerat kingulleq nalunaarfigivaannga nuuttariaqalerlutik, taanna oqarpoq.

Taamaammat upalungaarsimasut qatserisartunik sulisussarsiulerput, amerlanerusunillu qatserisartoqalernissaa Bjarne Markussenip neriuutigaa.

-Tassa piumasaqaatit malillugit minnerpaaffissaaniinnikuupput innuttaasut amerlassusaat apeqqutaalluni pingasut, taakkualuunniit sinnersinnaagutsigit aamma qujanassagaluarpoq, taanna oqarpoq.

IKUALLATTOQARNERANI AJUNAARTOQARNERA AAMMA INATSISINIK UNIOQQUTITSINEQ

Angut 45-nik ukiulik Upernaviup avannaani Nutaarmiuni februaarip qulingani ikuallattoqarnerani ajunaarpoq.

Tamatuma kingorna nunaqarfimmi inatsisitigut piumasaqaataasut malillugit qatserinermut atortorissaaruteqaranilu qatserisartoqanngitsoq KNR-ip paasivaa.

Nutaarmiut 60-it missaanni inoqarpoq, nunaqarfillu Nutaarmiutut atsigisoq pineqarpat inatsit naapertorlugu piumasarineqarpoq minnerpaamik qatserummik motoritalimmik innermullu qamitsissutaasinnaasumik peqartinneqassasoq, aammalu qatserisartut ittoqassasut qatserisartullu ikinnerpaamik sisamaassasut, Nutaarmiunili taamaattoqarsimanngilaq.

Tamatuma saniatigut kommunimi annaassiniarnermut upalungaarsimasut qatserisartoqarnissaanik upalungaarsimanermilu atortorissaaruteqarnissaanik minnerpaamik piumasaqaatinik naammassinninnissaq akisussaaffigaat.

Piumasaqaataasullu ataallugit pissutsit ippata kommune pisussaavoq immikkut ittumik qinnuteqartussaalluni. Matumani soorlu atortunut assartuutissaqanngippat imaluunniit nunaqqatigiit agguaqatigiissillugit killeqarpata nunalluunniit isorartussusaa matumani akimmisaarutaalluni pisoqarpat.

Immikkulli qinnuteqartussaatitaaneq Avannaata Kommuniata qinnutigisimanngilaa. Tamatumunngalu Avannaata Kommuniani kommunalbestyrelsit ilisimasimanngimmassuk kommunip nunaqarfiini pingasuni qatserutinik qatserisartunillu amigaateqartoqarnera patsisiginerarneqarpoq. 2021-mi juunip qaammataani Ukkusissani illu ikuallammat inuit pingasut ajunaarput.

Tamatuma kingorna Avannaata Kommuniata upalungaarsimanissamut tunngatillugu akisussaaffigigaa uppernarsarneqarpoq, najukkani tamani akisussaaffigisamini isumaannaallisaanermut atortutigut qulakkeerinnittussaanini.

Allisiguk

Nunaqarfimmili qatserisartunik atorfinitsitsiniarneq ajornakusoorsinnaavoq. Qatserisartummi amerlanertigut nammineq kajumissutiminnik sulisuusarput, taamaattumillu nunarfimmiut naliginnaasumik suliffiinut unammilleruminaalluni.

- Nunaqarfinni qatserisartoqarniarneq nikerartorujussuarnut ilaasarpoq ukua nammineq piumassutsiminnik qatserisartuusaramik taavalu allatut ajornartumik inuussutissarsiutertik aalisarneq salliutittarpaat. Taanna aporfilersorsinnaanngilarput, taanna oqarpoq.

Atortut nutaat atorneqassapput

Upalungaarsimasut suli qatserisartussarsioraluartut atortut nutaat Nutaarmiunut tikiunneqareersimapput. Tamanna innuttaasunut toqqissisimalersitsissasoq Bjarne Markussen oqaluttuarpoq:

- Tassa isumaga malillugu nunaqarfimmiut toqqissisimasinnaassapput aasaq taakkua atortut tikimmata maannga. Ingerlaannaq Nutaarmiuliaapput taavalu ingerlaannaq ilinniutigineqarlutik qanoq atorsinnaaneraat qanorlu paarilluarneqassasut, taanna oqarpoq.

Aamma atuaruk Ikuallannermi ajunaartoqarnerata kingorna: Avannaata Kommunia amerlanerusunik qatserisarfeqarusuttoq

Qatserisartunik atorfinitsitsiniarneq iluatsinngitsuussagaluarpat nunaqarfimmi innuttaasut atortunik qanoq atuisinnaanerat qanorlu paarsisinnaanerat ullumi upalungaarsimasuniit ilinniartitsissutigineqassaaq.

- Ullumi tassa qatserisartussarsiorneq aallartillugu innuttaasunut, atortuutit qanoq passunneqarsinnaaneri, ikuallattunik pilertoqassangaluarpat taakku ilinniartinneqassapput.

Aaqqissuussaq pissaaq Nutaarmiuni ullumi nalunaaqutaq aqqanernut qatserutaasiviup eqqaani.

Nutaarsiassami kukkunermik nassaarsimaguit uunga allaffigineqarsinnaavugut.