Ikuallannermi ajunaartoqarnerata kingorna: Avannaata Kommunia amerlanerusunik qatserisarfeqarusuttoq

Avannaata Kommunia nunaqarfimmini nutaanik qatserisarfiliorniarlunilu qatserisartut amerlanerulersinniarpai. Kommunip upalungaarsimanermut inatsisip minnerpaaffissaanik malinnissimannginnera saqqummereersoq taama aalajangerpoq.

Allattoq Rune Hvistendal Kristiansen

marsip 27-at 2023 07:01

Naqqiineq: Ilanngutassiami siusinnerusumi Avannaata Kommunia nunaqarfimmini arlalinni nutaanik qatserisarfiliorniartoq allassimagaluarpoq. Tamanna ilumuunngilaq. Upalungaarsimanermulli atortunut illuaqqat pineqartut, teknikkeqarnermut ingerlatsiviup pisortaa, Karl Madsen paasissutissiivoq. Eqikkaanik KNR-ip tunngavigisaa danskisut naammattumik nutserneqarsimanngitsoq, taanna oqarpoq.

Avannaata Kommuniata kommunip qatserinermi upalungaarsimanini sukateriffigingaatsiarniarpaa.

Tamanna kommunalbestyrelsip tallimanngormat kingullermik ataatsimiinneranit imaqarniliami allassimavoq.

Nunaqarfimmi Nutaarmiuni angutip 45-nik ukiullip illumi ikuallattumi februaarip qulingani ajunaarnerata kingorna taama aalajangertoqarpoq. Nunaqarfimmi inatsisitigut piumasaqaatit malillugit qatserinermut atortorissaaruteqaranilu qatserisartoqanngilaq. Taamaammat nunaqarfiup innuttaasui allatut iliuusissaqannginnamik illu ikuallattoq isigiinnartariaqarsimavaat.

IKUALLATTOQARNERANI AJUNAARTOQARNERA AAMMA INATSISINIK UNIOQQUTITSINEQ

Angut 45-nik ukiulik Upernaviup avannaani Nutaarmiuni februaarip qulingani ikuallattoqarnerani ajunaarpoq.

Tamatuma kingorna nunaqarfimmi inatsisitigut piumasaqaataasut malillugit qatserinermut atortorissaaruteqaranilu qatserisartoqanngitsoq KNR-ip paasivaa.

Nutaarmiut 60-it missaanni inoqarpoq, nunaqarfillu Nutaarmiutut atsigisoq pineqarpat inatsit naapertorlugu piumasarineqarpoq minnerpaamik qatserummik motoritalimmik innermullu qamitsissutaasinnaasumik peqartinneqassasoq, aammalu qatserisartut ittoqassasut qatserisartullu ikinnerpaamik sisamaassasut, Nutaarmiunili taamaattoqarsimanngilaq.

Tamatuma saniatigut kommunimi annaassiniarnermut upalungaarsimasut qatserisartoqarnissaanik upalungaarsimanermilu atortorissaaruteqarnissaanik minnerpaamik piumasaqaatinik naammassinninnissaq akisussaaffigaat.

Piumasaqaataasullu ataallugit pissutsit ippata kommune pisussaavoq immikkut ittumik qinnuteqartussaalluni. Matumani soorlu atortunut assartuutissaqanngippat imaluunniit nunaqqatigiit agguaqatigiissillugit killeqarpata nunalluunniit isorartussusaa matumani akimmisaarutaalluni pisoqarpat.

Immikkulli qinnuteqartussaatitaaneq Avannaata Kommuniata qinnutigisimanngilaa. Tamatumunngalu Avannaata Kommuniani kommunalbestyrelsit ilisimasimanngimmassuk kommunip nunaqarfiini pingasuni qatserutinik qatserisartunillu amigaateqartoqarnera patsisiginerarneqarpoq. 2021-mi juunip qaammataani Ukkusissani illu ikuallammat inuit pingasut ajunaarput.

Tamatuma kingorna Avannaata Kommuniata upalungaarsimanissamut tunngatillugu akisussaaffigigaa uppernarsarneqarpoq, najukkani tamani akisussaaffigisamini isumaannaallisaanermut atortutigut qulakkeerinnittussaanini.

Allisiguk

Avannaata Kommuniani borgmesterip, Palle Jermiassenip kommunip upalungaarsimanermut inatsimmik unioqqutitsineranut akisussaaffik tiguaa.

- Kommunalbestyrelse kommunemi upalungaarsimanissanut tamanut akisussaasuuvoq, naggataatigullu uanga akisussaaffigaara inatsisip malinneqartussaaneranut malititsisussatut, Avannaata Kommuniani borgmesteri Palle Jerimiassen februaarip 24-ani KNR-imut oqarpoq.

Aamma atuaruk Ikuallannermi ajunaartoqarnerata kingorna: Avannaata Kommuniata inatsit unioqqutippaa

Upalungaarsimanermut atortunut illuaqqat qatserisartullu amerlanerusut

Innuttaasullu maanna immikkut qularnaveeqquserneqangajalerput.

- Innuttaasut qatserisartunngorumallutik Nutaarmiuni, Naajaani Qeqertanilu ulluni makkunani nalunaarsimapput. Sulineq upalungaarsimanermut atortunut illuaqqanik pilersitsinissamut ataavartumik ingerlanneqassooq, imaqarniliami allassimavoq.

Teknikkeqarnermut ingerlatsiviup pisortaata, Karl Madsenip imaluunniit imaqarniliap qatserinermut atortorissaarutit suut upalungaarsimanermut atortunut illuaqqat sanaartornerannut ilaatinneqassanersut akissuteqarfiginngilaat.

Aamma atortorissaarutinik illuaqqanillu kina aserfallatsaaliuisuussanersoq aamma kommunip qatserisartoqarnerulernissaanik neriorsuutini qanoq ililluni eqquutsinniarneraa Karl Madsenip akissuteqarfigisinnaanngilaa:

- Atortorissaarutit saniatigut unammillernartoqarpoq, tassalu ilinniarsimanissap minnerpaaffissaanik piumasaqaat, pingaartumik nunaqarfinni. Isumaqarpunga tamanna kommunini tamani naammasseqaruminaatsuusoq, taanna oqarpoq.

Tamatuma saniatigut Avannaata Kommuniata qatserinermut atortorissaarutit suut nunaqarfinniinnersut nalunaarsulereerpai.

Upalungaarsimasummi Ukkusissani 2021-mi juunimi inuit pingasut ajunaarfigisaanik ikuallattoqarnerata kingunerisaanik illoqarfinni nunaqarfinnilu atortorissaarutit naammannersut tatiginarnersullu qulakkiissallugit akisussaaffilerneqarnikuupput.

Aamma atuarukUkkusissani ikuallattoqarmat imermut pumpit marluk atorsinnaanngitsut

Upalungaarsimasut kukkusunik paasissutissiisimasut

Nutaarmiunili ajunaarfiusumik ikuallattoqarnerata kingornatigut upalungaarsimasut Avannaata Kommuniani qatserinermut atortorissaarutit amerlassusissaanut atatillugu kukkusunik paasissutissiisimasoq paasineqarpoq.

- Ilisimatinneqarnikuuvugut kommunep illoqarfiini nunaqarfiinilu isumannaallisaaneq ajunngitsumik ingerlasoq. Tassalu taannaavoq aallaavigisarput, sapaatip-akunnerata siuliani Nutaarmiuni ikuallattoqarnissaata tungaanut. Paasivarpummi Nutaarmiuni, Naujaani aammalu Qeqertani Qaanaap eqqaani qatserisartoqaranilu qatseruteqarsimanngitsoq, Palle Jerimiassen qaammatip siuliani KNR-imut nassuiaavoq, nangillunilu:

- Uagut nammineerluta inuttut ilumut taamaattoqannginnersoq misissoriartugassarinngilarput, suleqatitsinnit ilisimatinneqartussaavugut taamaattoqannginnersoq taamaattoqarnersorluunniit, suleqatigummi tatigisussaavagut, taamaaliorpugullu.

Kommunillu tamanna aamma pissutigalugu attaveqaqatigiinnermi suna ajutoorsimanersoq misissorniarlugulu nutaanik aaqqiissutissarsiorniarpoq:

- Taamatorluinnaq paaseqatingiinniarnermi oqaloqatingiinnermi pittaanngittumik kukkusumik atortut pillugit attaveqatingiittoqarsimavoq. Tamakkua aamma nalunaarummi aaqqiiffiginissaat suliarineqarpoq, imaqarniliami allassimavoq.

Palle Jerimiassenip kommunilluunniit qullersaqarfia saqqummersitsinnginnermi apersorniarnerat periarfissaasimanngilaq.