Qatikivissortumik nipiliuut takornarialerinermut aalisarnermut uumasunullu iluaqutaassasoq

Qipoqqarnik Nuup saavani takussaasoqanngilaq, kisianni seqinnarillunilu qatsungagami nuisoqarataannaavoq.

Nuuk Water Taximik piginnittoq Anders Lykke Laursen takornarianik Nuup Kangerluani ukiut qulit matuma siornali angallassisartunngorpoq arfersiortitsikkajullunilu.

- Arfermik nuisoqarnissaa ajoraluartumik neriorsuutigisinnaanngilara, taanna illariaatigaluni oqarpoq immamullu nasilluni.

Ingammik qipoqqarnik bundgarninut ningisimasunut napittoqartarnera ukiuni kingullerni ajornartorsiutaakkajuppoq, taamaammallu Anders Lykke Laursen aaqqiissutissaqqissinnaasunik upernaarli ujartuilerpoq.

Aaqqiissutissaqqissinnaasunik ujartuinermini arfernut pallittaaliissutinik whalepingerinik taaneqartartunik nassaarpoq. Taakkua qatikivissortumik nipiliuutaapput aalisarnermut atortunut ikkunneqarsinnaasut.

- Napittoqaraangat erloqinartuaannarpoq, arfermi napittoq toqunngikkuni aalisarnermut atortut innarlertarma iliuuseqarniarluta aalajangerpugut, taanna oqarpoq.

Arferit nigorsimaartalertut

Taamaammat Nuuk Water Taxi whalepingerinik 50-inik KNAPK-mi ilaasortaani bundgarnersortartunut tapiissuteqarluni maajimi agguaavoq.

- Imaq allallu soorlu aalisartut piniartullu tamatta atortuuarput, taamaammat assigiinnarpaa suleqatigiikkutta, Anders Lykke Laursen oqarpoq.

Qipoqqaat arajuttut arfersiornermi qanimut siumugassaakkajupput.

Qeqertarsuartiaarmiu Steffanus Boye arfernut pallitaaliissummik tunineqartunut ilaavoq. Taanna taamaattumik tunineqarneraniit sapaatit akunneri marluk qaangiussimalerput. Arfernullu pallittaaliissutitt taassuma oqarnera naapertorlugu iluaqutaapput: Tassa arferit nigorsimaartalerput.

- Uumatitsivimmiittuutikka, immaqa talerormerngernerminik patitsissimavai. 30 tonsit missarpiaaniissorakka immikkakka, taava 6 tonsit missarpiaannaalertippai ajoraluartumik imai. Tassa bundgarnikka uumatitsivikkalu qanittuararsuusaqattaarpai tikillugit. Tikisimallugit. Nuanniigivara taamatut soorlu peqanngikkallarnerup nalaani qimaasaarummik, kisianni ikkussigama peerupput. Tassa qimaasaarutaasimavoq taanna qataatsuaqqamik nipiliortoq, Stefanus Boye unnersiorpoq.

Aalisartumik qipoqqarmik aalisarnermut atortuinut qanillattortoqartoq paasigamiuk sakkortuumik qisuariartumik takunikuullutik, Nuuk Water Taximik piginnittoq Anders Lykke Laursen oqarpoq.

- Tassami arferisortitavullu tupaallaatigeqisatsinnik qipoqqarmut bundgarninut qanillattortumut issussisumik arfersiortitsinitsinni takunninnikuuvugut.

Arfersiortitsisarnertik tunissuteqarnerminnut pissutaaqataalluinnartoq

Whalepingerit arfernut aalisarnermullu atortunut illersuutissaqqissinnaasuusut tusarmag, Anders Lykke Laursenip misilikkusuummerpai.

- Aalisarnermut atortut innarleqqunagit arfernut qanillattortunut sakkortuumik iliuuseqartoqartartoq paasisinnaavara, taamali pisoqaqqinnginnissaanut iluaqutaasinnaappata soorunami atoqqunarput.

Arferilli aalisarnermut atortunut qanillattortut toquttariaqartarnerisa pinngitsoortinnissaa aamma soqutigigitsik, Nuummi takornarianik angallassinermik allanillu neqerooruteqarnerpaasartut ilaannik Nuuk Water Taximik piginnittup miserratiginagu oqaatigaa.

Nuup Kangerluani ukiorpaalunni arfersiortitsisartoq Anders Lykke Laursen Nuup saavani arfeqarneranik qinertoq assimi takuneqarsinnaavoq.

- Qipoqqaarutinngissaanut soorunami tapersersuivugut, arfersiortitsisaqigattami. Arfeqartuassaaq. Aalisartut taakkualu aalisarnermut atortuisa innarlertannginnissaat eqqarsaatigalugu immitsinnullumi eqqarsaatigaluta taamaaliorpugut.

Whalepingeri ataaseq 1.200-it 1.700 koruunit akornanni akeqartoq bundgarnillu nutaat 30.000 koruunit angullugit akeqarsinnaasarmata whalepingerinik atuineq imminut akilersinnaalluartoq, Anders Lykke Laursen oqarpoq.

Arferimmi illersornissaannut Nuuk Water Taximiit nammineq qanoq iliortarpisi – assersuutigalugumi motoorerpaluk arferit akornutigisaraat ilisimatusartorpaalunnit oqaatigineqartarpoq?

- Arferit qanoq qanilattorsinnaatiginerannut pisortatigoortunik malittarisassaqarpoq – malersorneqartutut misigeqqunagit tunuanniit maleqqusaanngilagut, aamma tungaannut ingerlaaqqusaanngilagut. Siumuigaangatta angallatitta motooria qamikkajupparput, alapernaatsuugamilli angallatatta nuannaarutigisaqisaannik angallatitsinnut nammineerlutik aamma qanillattukkajupput.

Anders Lykke Laursernip Nuup saavani oqaloqatiginerani arfermik arajuttumik takunngilagut, kisianni Nuup Kangerluani piffissami kingullermi pisarnerminngarnit qipoqqaqarneroqisoq taanna oqarpoq.

- Arfermik siumugaqanngitsooratarnissamut qularnaaveeqquseeqqittalernikuuvugt. Qipoqqaat Nuup Kangerluani eqqissimatitaanerat taamaalioqqissinnaalernitsinnut pissutaaqataavoq, aammali aalisarnermut atortunut whalepingerilersuinermik pissuteqavikkunartumik aasaq manna pisarnerminngarnit qipoqqaqarnerunera.