Qarasaasiat atisallu atuanngitsuukulasarneq annikillisissagaa
- Atuartut ukioqqortusiartornerminni atuanngitsoortarneri inortuisarnerilu qaffakkiartortartut, taannalu kommunalbestyrelsemiit ernumanartutut isumaqarfigivarput, iliuuseqarfigineqartariaqartutullu nalilerlutigu, Qeqqata Kommuniani borgmesteri Malik Berthelsen oqarpoq.
Isumaqatigiissut ukiuni tallimani atuuttussaq
Sulisitsisut Peqatigiiffiat, kommuni, atisaarniarfillu Anuni meeqqat atuarfiini atuanngitsoortarneq annikillisarniarlugu ukiuni tallimani atuuttussamik isumaqatigiissusiorput.
Qeqqata Kommuniata atuarfiini 7. klassini 8.klassinilu atuartut piffissaq eqqorlugu takkuttartut tunniusimasullu aasaq manna aallarnerfigalugu akissarsitinneqartalissapput.
AAMMA ATUARUK Kangerlussuup kangia illuaraqarfinngorsinnaavoq
Sulisitsisut Peqatigiiffiata 7. klassini atuartut pingasut qarasaasianik akissarsitissavai atisaarniarfiullu Anunip 8. klassini atuartut marluk atisanik akissarsitillugit.
Atuanngitsuukulasarnerup taamaaliornikkut annikillisarnissaa neriuutaavoq, pissusissanimmi malinnilluarneq atuarnermi sulinermilu pingaaruteqaqisoq, GE isumaqarpoq:
AAMMA ATUARUK Malik Berthelsen Meeqqanut ambassadørinngortinneqartoq
- Ilinniarnertuunngorniarfinnut ilinniarfinnulluunniit, soorlu sanasutut ingerlaqqinnginnermi, ileqqorilissappassuk meeqqat atuarfiini aallartissaagut, Sulisitsisut Peqatigiiffiata Sisimiuni immikkoortortaqarfiani siulittaasoq Lars Løvendahl oqarpoq.
Atuanngitsuukulasartulli ikilisinniaraanni annertunerusumik iliuuseqartoqartariaqartoq, taanna oqarpoq.
- Una misilipparput aallartinnissaa ajornanngitsunnguummat. Nalunngilarput tamakkiisumik aaqqiisinnaanngitsoq, allatigummi aamma iliuuseqartoqartariaqarpoq.
Angajoqqaat akuutinneqarnerussasut
Borgmesteri naapertorlugu angajoqqaat akuutinneqarnerunissaat kommunip saniatigut sulissutigaa:
- Nalunngilarput angajoqqaaqartoq arlaatigut ajornartorsiornertik pissutigalugu nukissaaleqisunik. Taakkulu qanoq iliuuseqarfiginiarlutigit isumaginninnermut siunnersortinik atuarfinniitsitsisalerpugut, tassanilu anguniakkatta ilagivaat meeqqat atuariartorneq ajortut angajoqqaavi pissarsiaralugit meeqqat sooq atuariartortannginnerat pillugu oqaloqatigineqartalernissaat.
AAMMA ATUARUK Atuartut angajulliit pinngortitami atuartinneqartalilersut
Borgmesteri naapertorlugu periuseq atuartunik kajumilersitsissaaq piumassuseqarnerulersitsillunilu. Atuartullu tunniusimalluartut atuaqatiminnut maligassiuisinnaassapput.
Sulisitsisut Peqatigiiffiat isumaqataavoq:
- Taava paasissavaat suliamik naammassisaqaraanni akissarsiassaqartoq. Soorlu suliffeqarfinni sunngiffimmilu aamma taamaattoq, Lars Løvendahl oqarpoq.
