Kangerlussuup kangia illuaraqarfinngorsinnaavoq

Tassalu 154-inik illuaqqiortoqarsinnaalissaaq, soqutiginnittullu amerlasut Qeqqata Kommuniani borgmesteri oqarpoq.

- Siusinnerusukkulli Kangerlussuarmiuniit arlaleriarluta aperineqartarnikuugaluarpugut tamatuma nalaani illuaqqiortoqarsinnaanersoq. Taava massakkut tamakkua periarfissat ammaappagut, Malik Berthelsen oqarpoq.

Sumiiffik pineqartoq tassaavoq qangattannguit aamma Sugar Loaffimik taaneqartartup eqqaa. Tassa Kangerlussuup kangiani illuarartaarusuttut Qeqqata Kommunianut ataasinngormat qinnuteqarsinnaanngorlugit aalajangiunneqarpoq.

- Tassa takornarialerisut, innuttaasut imaluunniit allat ilisimasassarsiortut qinnuteqarsinnaassapput.

Sanaartorfiusinnaasullu tungaanut kommuni oqilisaaniarpoq.

- Illuaqqiorfissat ilaat aqqusineqannginnamik taamaattumik kommunip akileeqataaffigisassaanik aqqusinniortoqassaaq illuaqqiorfissaq tikikkuminarsarniarlugu.

Amerikarmiut Kangerlussuarmi sakkutooqarfeqarallarmata Qangattannguit kitaanut timmisartumik  nakkartoqarnikuuvoq. Imassanillu ulorianartunik peqarnersoq misissorneqarnikuunani. Tamannali uloriananngitsoq borgmesterip qulakkerpaa.

- Illuaqqiornissamut ulorianartoqanngilaq.