Qaqortup napparsimmaviani ernisarfik ammarneqaqqikkallangajalertoq
Qaqortumi naartusut Nuummi Dronning Ingridip napparsimmavissuanut juunip aallaqqaataata kingornali erniartortariaqartarput.
Qaqortulli napparsimmaviani ernisarfik marlunngorpat, tassa juulip ulluisa 18-ianni, ammaqqinneqaqqikkallartussanngormat, tamaani naartusut najukkamini ernisinnaalerput.
- Oktobarimi sulilertussannik sulisussarsiortoqaleruttorpoq. Atorfiit pingaarutillit inuttaqartuarnissaat Peqqinnissaqarfiup sulissutigiuarpaa, Peqqinnissaqarfiup attaveqatigiinnermi siunnersortia Susanne Mailand Lauridsen akissummini allappoq.
Atorfinittussarsiniarneq imaannaanngeqisoq
Qaqortup napparsimmavia passuttarialinnik pilatsittariaqarlutillu ernisunik ikiuussinnaasumik pilattaasartumik nakorsaqarunnaarmat, Qaqortumi ernisarfik siorna aggustimi matuneqarallarpoq.
Tamanna naartusut ernisussiornermullu tunngasunik suliallit ernumaammerujussuarnerannik kinguneqarpoq. Illoqarfinni allani napparsimmaviit ernisarfii matuneqartareerput, Aasianni ernisarfik matuneqartuni kingulliulluni, tassa 2019-imi.
Tassa Ernisussiortut Kattuffiata aamma Peqqinnissaq Pillugu Kattuffiit (PPK) Qaqortumi qitiusumik napparsimmaviup siunissaa ernummatigaat.
Qaqortummi napparsimmavia peqqissaavinngortinneqarluni ernisarfeqarunnaavilernersoruna?
Qaqortumili taama pisoqanngilaq. Tamaanimi ernisarfik maneqarallareerluni ukioq manna januarimi ammarneqaqqikkallarpoq. Tassa nakorsanik pilattaasartunik kingoraartissarsisoqarmat qammatialunni ammarneqaqqikkallarpoq. Juunilli aallaqqaataani matuneqarallaramili suli ammarneqaqqinngilaq.
Sulisussarsiniarneq ajornakusooqisoq
Nakorsanik pilattaasartunik Kujataani atorfinitsitsiniarneq ajornakusooqisoq, peqqissutsimut naalakkersuisoq Mimi Karlsen (IA) KNR-imut septembarimi oqarpoq.
Taanna Peqqinnissaqarfimmi sulisussanik atorfinitsitsiniarnermik Danmarkimi suliaqartoq tikeraaqqammeraa taamanikkut oqaluupparput.
- Suleqatigiit taakku Danmarkimi sulisut peqatigiiffinik A-kassinillu suleqateqarput, atorfinissinnaasunik sulisussarsiorlutik angalasarput, soorlu Odensemi Universitetshospitalimu, Rigshospitalimut allanullu, Mimi Karlsen KNR-imut taamanikkut oqarpoq.
Ernisarfiit matoorartut:
- Aasianni ernisarfik matuneqartuni kingulliuvoq. Tassani sulisussanik naleqquttunik piginnaasalinnik amigaateqarneq pissutaavoq. Siullermik matugallarneqartoq nalunaarutigineqarpoq.
- Uummannami ernisarfik 2017-imi matuvoq.
- Maniitsumi 2012-imi ernisarfeqarunnaarpoq.