Qamutilittarneq erinarsoqatigiinnerlu: Dronningi facebookikkut nalliussineqassasoq
Droninngi apriilip ulluisa 16-ianni inuuissioraangat meeqqat inersimasullu erfalasuaralisarlutik Nuup Saavani qamutilittarnermi najuuttarput.
Dronningili ukioq manna akunnaalliliisussaagaluartoq Nuup Saava katerittoqassanngilaq. Meerarpassuit erfalasuaralisarlutik kalaallisoortulluunniit najuutissagunanngillat.
11:45: Charlotte Ludvigsen tikilluaqqusissaaq
12:00: Nuutoqqamit kanoninik aallartitsineq
12:10: Charlotte Ludvigsen oqalugiassaaq
12:20: Dronningimut inuuissiortoorneq
12:35: naammassissaaq
Tigusiffik: Kommuneqarfik Sermersooq
Kommuneqarfik Sermersuup dronning Margrethep 80-iliinera coronavirusimik ajornartoorneq pissutigalugu allatut aaqqissuussilluni nalliussisariaqalersimavaa.
Nunatsinni illoqarfiit pingaarnersaat ammariartoqqikkaluartoq illoqarfimmi tassani inuit - aamma silami - katerinnermi amerlanerpaamik quliunissaat innersuussutaajuarsinnarpoq.
Dronningip nalliussineqarnissani nammineq taamaatikkaa
Droninngip 80-iliinermini nalliuttorsiornissani coronap ajornartorsiortitsinera pissutigalugu sapaatit-akunneri qassiiusut matuma siorna taamaatiinnarpaa. Dronningilli nalliussinissaanut periarfissaqarputit - tamannani allaanerulaaginnassaaq.
- Katersoqqusaannginnatta, Facebookerput atorlugu aaqqissuussisimavugut, Charlotte Ludvigsen Kommuneqarfik Sermersuumi borgmesteri oqarpoq.
- Qilanaartorujussuuvunga, nangilluni oqarpoq.
AAMMA ATUARUK Dronningi: Nalliuttorsiorneq isumaatsuliornerullunilu soqutigittaanneruvoq
Kommunip Facebook atorlugu nalliuttorsiorniarluni aalajangerpaa, taamaammat dronningimik nalliuttorsiutiginninniartut qarasaasiaq atorlugu katersuussinnaapput. Peqataaniartut kommunip Facebookimi qupperneranut isiinnarsinnaapput.
- Massakkut piffissami erloqinartumiippugut. Siornatigut Dronningip nalliunnera Nuutoqqami oqalugiartoqarluni, erinarsortoqarneratalu kingorna kanonit aallartinneqartarlutik malunaartinneqartarsimavoq.
- Meeqqerivimmiittut allallu peqataarusuttut tamarmik nalinginnaasumik qaaqqusaraluarpagut. Ukioq mannali taamaaliorsinnaanngilagut, Charlotte Ludvigsen oqarpoq.
Utoqqaat naasunnannatik kaagisortinneqassasut
Qarasaasiaq atorlugu nalliuttorsiorneq taamaammat nalunaaqutaq 11.45 aallartinneqassaaq, borgmesterilu angerlarsimaffimmiit malinnaasunut tikilluaqqusilluni aallartissaaq. Pisarnerlu nalillugu Issittumi Sakkutooqarfik Nuutoqqami kanoninik aallartitsissaaq.
Tamatuma kingorna nipilersortartut Kuunu Berthelsen, Glenn Møller amma Nuummi Mælkebøttenimeersut peqatigalugu inuuissiortumik erinarsoqatigineqarsinnaapput.
AAMMA ATUARUK Dronningi 80-iliinermini naasunik nasseqqunngitsoq
- Utoqqarmiuni najugaqartut ullormik malunnartitsisoqarnerani lagkagetortinneqassapput. Dronningimmi utoqqaat kiserliortut naasumik tunineqarnissaat innersuussutigaa, borgmesteri, Charlotte Ludvigsen oqarpoq, nangillunilu:
- Piffissamili matumani naasunik tunniussassatsinnik peqarpallaanngilaq. Taamaammat utoqqarnut lagkagillerniarluta aalajangerpugut.
