Dronning apriilip ulluisa 16-ianni 80-inik ukioqalertussaavoq, inuuissiorneranullu atatillugu nalliuttorsiornissat pilersaarutaasut Danmarkimi coronavirusip siaruaannera pissutigalugu taamaatiinnarneqarput.Assi: Scanpix

Dronningi 80-iliinermini naasunik nasseqqunngitsoq

Dronning Margrethe apriilip qaammataani nalliuttussaavoq, nalliunnerminilu naasunnakkusunngilaq. Naasut utoqqarnut ilungersuuteqartunut nassiunneqarnissaat dronningip siunnersuutigaa.

Dronning Margrethe apriilip ulluisa 16-ianni 80-iliiguni naasunik nassinneqarusunngilaq.

Tamanna coronavirusimut tunngatillugu pissutsit ilungersunarneranik pissuteqartoq, kunngikkormiut tusagassiuutinut nalunaarummi paasissutissiipput.

- Utoqqarpassuit piffissami matumani ilungersuuteqartut naasunik ukioq manna nassinneqarnissaat dronningip siunnersuutigaa, tusagassiuutinut nalunaarummi ilaatigut allassimavoq.

Tamatuma saniatigut Det Gule Palæmut ornigulluni ilassinnikkiartornissaq periarfissaassanngilaq. Tassungalu taarsiullugu kunngikkormiut nittartagaatigut pilluaqqusiniarluni allaffissaq apriilip 14-ianni ammarneqassasoq, tusagassiuutinut nalunaarummi allassimavoq.

Dronning apriilip ulluisa 16-ianni 80-inik ukioqalertussaavoq, inuuissiorneranullu atatillugu nalliuttorsiornissat pilersaarutaasut Danmarkimi coronavirusip siaruaannera pissutigalugu taamaatiinnarneqarput.

AAMMA ATUARUK Dronningi: Nalliuttorsiorneq isumaatsuliornerullunilu soqutigittaanneruvoq

Danskit dronningiat katetinik ingerlaarnermik, København Rådhusimi ilassinninnermik kiisalu Fredensborg Slotimi nereqatigiinnermik qitinnertalimmik ilaatigut nalliuttorsiutigineqartussaagaluarpoq.

Taakku tamarmik coronavirusi pissutigalugu pilersaarutinik allannguisariaqarnermi marsip ulluisa arfineq-aappaanni taamaatiinnarneqarput.

Innutaasorpassuilli dronningip nalliunnera malunnartikkusuppaat. Facebookimi atuisut 170.000-it missaanniittut quppernermi ”Danmark synger for dronningen”-imik atsikkami katersuupput, quppernermilu tassani ilaasortat dronningip 80-iliinerani ungasikkaluarlutik erinarsoqatigiinnissaat kaammattuutigineqarpoq.

- Aneerasaartarfinnit, igalaakkut, naatsiivimmi, suliffimmi – sumiikkaluaruttaluunniit. Coronap pisortatigoortumik nalliuttorsiornissaq matunikuummagu – nammineerluta ullormi tassani malunnartitsissaagut, quppernerup nassuiaataani ilaatigut allassimavoq.

Dronning Margrethe marsip ulluisa 17-ianni tv-kkut aallakaatinneqartumi oqalugiarpoq. Tassanilu coronavirusi ”tikeraatut ulorianartutut” taavaa, innuttaasullu oqartussat siunnersuutaannik malinninnissaat katerisimaarnernilu annertuuniinnginnissaat kaammattuutigaa.

Allatut iliortoqarsinnaanngitsoq, dronningip oqaatigaa.

/ritzau/

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat