Kuno Fencker: Qallunaat malittarisassaat nunatsinnut naleqqussartariaqarput
Kalaallit Nunaata Danmarkimik niueqateqannginnissaanik niueqateqarunnaarnissaanilluunniit oqarneq paatsuuineruvoq. Partii Naleraq sinnerlugu folketingimut qinigassanngortittoq Kuno Fencker oqarpoq.
Qinigassanngortinnini sapaatip akunnera kingulleq nalunaarutigaa. Sermitsiaq.AG -p aamma KNR -ip isumaqarsimanerarpaat Kalaallit Nunaat siunissami Danmarkimik niueqateqarnissaminik annikillisaassasoq.
Kisianni Kalaallit Nunaat massakkut nunanik allanik niueqateqarnissaminut pisinnaareerpoq, tamannalu Kuno Fenckerip nammineq erseqqissarpaa.
- Kinaluunniit nunamik, niuerfimmik imaluunniit suliffimmik niueqateqarnissamik killilersorneqarsinnaanngilaq. Kikkut tamarmik kikkunnilluunniit niueqateqarnissaminnut pisinnaatitaasariaqarput, Kuno Fencker oqarpoq.
Kuno: Kalaallit Nunaannut malittarisassat eqaallisarlugit
Folketingimut ilaasortanngussaguni Kalallit Nunaanni qallunaat oqartussaaffiisa nunatsinnut pissutsinut pitsaanerusumik naleqqussarnissaat anguniagassami ilagigaat oqarpoq.
Tamatumunnga assersuutaasinnaavoq Inuussutissalerinermut aamma Uumasunut Nakorsaqarfimmut Aqutsisoqarfik (Fødevare- og Veterinærstyrelsen), nunatsinni qallunaat oqartussaaffigisaat.
Inuussutissarsiornermik siornatigut suliaqartuunermini Kuno Fenckerip nalaattarsimavaa qallunaat uumasut nakorsaqarnermut malittarisassaat unammillernartunik pilersitsisartut, assersuutigalugu USA-mi nerisassanik piariikkanik tunisassiortoq saarullinnik Kalaallit Nunaannit piserusukkaluartoq pillugu suliaq.
AAMMA ATUARUK Atlantikup avannaamiut qineqqusaartut tikkuaanissaat pillugu aalassassimaneq Lars Løkkep pisuussutiginerarpaa
- USA-mut toqqaannartumik nassiunniarnermi unammillernartunik aqqusaagaqartitaavugut. Toqqaannartumik nassiunneqarsinnanngillat, kisanni aatsaat qallunaat umiarsualiviatigoorlugit ingerlateqqinneqarsinnaallutik. Soorunami tamanna unammillernartuuvoq, pisariinnerpaassagaluaramimi toqqaannartumik USA-mut nassiukkaanni, Kuno Fencker oqarpoq.
Taamaattumik inuussuutissarsiornerup iluani ileqqunngornikut malittarisassallu nutartertariaqarput, isumaqarpoq.
- Siornatigut kisermaassinerit kingornussimasavut nalitsinni Kalaallit Nunaannut akornusersuutinik pilersitsisinnaapput. Uangalu anguniagaraara killilersugaannginnerusumik pituttorsimannginnerusumillu ingerlatsinissaq.
Siunissami namminersulivinnissaq
Oqartussaaffiit sorliit aamma qaqugu Namminersorlutik Oqartussat Danmarkimit tigussaneraat Naalakkersuisut aamma Inatsisartut aalajangigassaraat.
Partii Naleraq Kalaallit Nunaata sapinngisamik sukkasuumik namminersulivinnissaanik anguniagaqarpoq. Siullermilli alloriarnerit arlallit aqqusaartariaqarput, Kuno Fencker isumaqarpoq.
- Massakkorpiaq alloriarnissaq siulleq tassaavoq Folketingimut isernissaq, oqartussaaffiilu pineqartut Kalaallit Nunaannut tulluarsassallugit naleqqussassallugillu.
AAMMA ATUARUK Socialdemokraatit suleqatigissallugit aalajangiutereerpavut
