Politikki

RAL-ip siulittaasorisimasaa Folketingimut qinigassanngortittoq

44-nik ukiulik Kuno Fencker Partii Naleraq sinnerlugu Folketingimut qinigassanngortittoq Partii Naleraq pingasunngornermi tusagassiortunik katersortitsinermi nalunaarutigaa.

Allattoq Helle Nørrelund Sørensen

marsip 21-at 2019 08:23

Kuno Fencker inuussutissarsiutinik suliaqarsimavoq, aamma Royal Arctic Linep siulersuisuini siulittaasuusimavoq.
Kuno Fencker Folketingimut qinigaaguni, nunatta nunat tamat akornanni kiffaanngissusseqarnerunissaa anguniarpaa, ilaatigut niuernermut tunngasuni, aviisimut Sermitsiaq.AG-mut taama oqarpoq.

- Danmarkimut attaveqarnerput qasukkarnerusariaqarpoq, maani Kalaallit Nunaanni aalajangersinnaanerusariaqarparput Danmark aamma nunat allat sutigut suleqatigisinnaanerigut, Kuno Fencker oqarpoq.

Aviisimi Sermitsiaq.AG-mi allaaserineqartoq naapertorlugu, Kuno Fencker Partii Naleqqamut marlunngornermi ilaasortanngorpoq. Politikerinngornissanilu 2000-mili isumaliutigilersimavaa.

Partii Naleqqap Folketingimut qinigassanngortitai maannamut marluuppoq. Aningaasaqarnermut Naalakkersuisuusimasoq Pele Broberg Folketingimut aamma qinigassanngortippoq.

Nutaarsiassami kukkunermik nassaarsimaguit uunga allaffigineqarsinnaavugut.

RAL-ip siulittaasorisimasaa Folketingimut qinigassanngortittoq

Aamma atuaruk