Siumut: Socialdemokraatit suleqatigissallugit aalajangiutereerpavut
Folketingimut qinersinissaq qalliartorpoq, qinersinissarlu sioqqullugu Siumumit Socialdemokraatit siulittaasuat, Mette Frederiksen ministeriuninngortussatut toqqarneqarpoq.
- Isummersortariaaseqarnerput tunngavigalugu taanna apeqquserneqarsinnaarpianngitsumik inissisimavoq, tassa nunarput taavalu qallunaat nunaanni socialdemokraatit Siumullu akunnitsinni paaseqatigiissutigilluinnartagarput, tassa nunatta namminiilivikkiartuaarnera tassani nipilersoqataavoq, Siumut sinnerlugu Folketingimut qinigassanngortittoq Ineqi Kielsen oqarpoq.
Folketingimi ilaasortat Atlantikup avannaaneersut Folketingimit qinersinissaq utaqqimaaqqaarumavaat, ministeriuninngortussamillu maannamut toqqaajumanngillat, tamannalu apequserneqarpoq.
- Uani illuatungaani apeqquserusuppakka taamannak avammut nalunaaruteqartut. Ilumut aamma pissaneraat taanna perusutartik. Imaassinnaavoq amerlanerussuteqavissunik qinigaasoqartoq, taamaalillunilu pisariaqartinnagu ukua nordatlantisk mandatinik taaneqartartut atornissaat (qinikkat Atlantikup avannaaneersut, aaqq.). Taava isumaqatigiissut sumiippa? Uani Siumumi siumoortumik oqariartuuteqareernitsinni akisussaaffimmik tigusivugut, aamma piareersarfigaarput ministeriuninngortussap tulliata Mette Frederiksenip suleqatiginissaa, aamma taanna qangali aallartinneqareernikuuvoq, soorlu allagarisanni 2016-imi nunatsinniinnikuuvoq, Ineqi Kielsen oqarpoq.
AAMMA ATUARUK Aleqa ministeriunertut qinigassanngortittumik aalajangersimasumik toqqaanianngitsoq
Siulittaasoq suleqatigiumaneqartoq
- Mette Frederiksenip paasilluarsinnaavaa nunatta namminiilivikkusunnera, - aamma kisiartaalluni ministeriuninngortussatut qinigassanngortinnikuni. Nunatsinnut oqariartuuteqartarpoq namminiilivinnissaq suleqataaffigerusullugu. Taamaattumik Siumumit Mette Frederiksen ministeriunertut toqqassavarput, Ineqi Kielsen oqarpoq.
Siumut sinnerlugu Foketingimut qinigassanngortittut katillugit sisamaasut tassaapput:
Ineqi Kielsen, Ulrikka Holm, Aki Mathilda Høegh Dam aamma Jens-Erik Kirkegaard.
