Aleqa ministeriunertut qinigassanngortittumik aalajangersimasumik toqqaanianngitsoq

Aleqa Hammondip Folketingimut qinigassanngortittut Atlantikup avannaaneersut allat arlallit assingalugit kina ministeriunertut tapersersorumanerlugu Folketingimut qinersinissaq sioqqullugu oqaatiginianngilaa.
Assi © : Nunatta Qitornai
marsip 18-at 2019 10:56
Nutserisoq Simon Uldum

Politikeri tusagassiorfinnut nalunaarummi taama allappoq.

Aleqa Hammondilu qinigaaqqissagaluaruni tamatumunnga taarsiullugu danskit naalakkersuisooqatigiivi nunatta pitsaanerpaamik iluaqutigisinnaasai isumaqatigiissuteqarfigerusuppai.

Folketingimut ilaasortanit Atlantikup avannaaneersunit sisamaasunit pingasut taamaalillutik ministeriunermik aalajangersimasumik tikkuagaqanngillat.

AAMMA ATUARUK Aleqa Hammond genopstiller til Folketinget

Folketingimut ilaasortat Inuit Ataqatigiinneersup Aaja Chemnitz Larsenip aamma Savalimmiuni Republikanerineersup Magni Argep tapersersuinissartik Danmarkimi ministeriunertut toqqarneqartumut isumaqatigiinniutissatut atorumavaat.

Savalimmiormiu Javnaðarflokkurinimeersoq Sjúrður Skaale kisiartaalluni Socialdemokraatit siulittaasuat Mette Frederiksen ministeriunertut nutaatut tapersersorniarlugu siumut oqaatigereerpaa.

Folketingillu avataaneersup, Suleqatigiissitsisuneersup Louis Sigurdsenip, nalunaarutigaa qinersinerup kingorna isumaqatigiinniartoqareerpat aatsaat kina ministeriunertut tapersersornerlugu oqaatiginiarlugu.

AAMMA ATUARUK Kalaallimik pisivugut

Venstremut isumaqatigiissutini illersoraa

Aleqa Hammond Siumut sinnerlugu Folketingimut 2015-imi qinigaavoq. 2016-imiillu attaviitsunngorpoq kingornalu Danmarkimi naalakkersuisoqatigiit VK-meersut isumaqatigiissuteqarfigai, Folketingimi ikinnerussuteqalissutaasinnaasumik taaseqataasassanani.

Tamatumunngalu taarsiullugu Aleqa Hammond Folketingip Kalaallit Nunaannut tunngasunut ataatsimiititaliaani siulittaasunngortinneqarpoq. Taamatullu isumaqatigiissuteqarnini nunatsinnut iluaqutaasimanerarpaa.

Danskit naalakkersuisui taamaalillutik Folketingimi ilaasortat nunatsinneersut Naalakkersuisullu allaanerusumik toqqissimanarnerusumillu suleqatigisinnaalerpaat, ilaatigut illersornissakkut, inatsisinik atuutsitsinermi sakkutuullu eqqagassaataannik qangarnisanik saliinissamut aningaasaliinikkut, Aleqa Hammond taama oqarpoq.

- Qinersisartut ilisimatissinnaavakka, Nunatta Qitornai partiit akimorlugit danskit nunami namminermi politikkimi soqutigisat isumaqatigiinniarnermi ima pitsaatigisumik misilittagaqarfigigai, Nunatsinni pitsaanerpaamik ineriartortitsinissami pissutsit pitsaanerpaat pissarsiffigissallugit nanginnissarput - aamma qinersereernerup kingorna, Aleqa Hammond oqarpoq.