KNAPK: Qaleralinniartoqarpallaarpoq
Qeqertarsuup tunuani, Uummannami Upernavimmilu sinerissap qanittuani qaleraleqassuseq kinguariarmat qaleralittarineqarsinnaasunut innersuussutit apparneqarput.
AAMMA ATUARUK Avataani qaleraleqarluarnera sinerissap qanittuanut pitsaasumik sunniuteqarsinnaasoq
- Tupiginngilara, pissutigalugu mikisunik tulaassuineq annertoorujussuanngornikuugami. Taavalu ilisimatuussutsikkut nalilersueriaaseq taava aamma uagut aalisartut namminneq misigisatsinnik nalilersueriaasigut ataqatigiisikkuminaattorujussuugamik, KNAPK-p siulittaasua Henrik Sandgreen oqarpoq.
Naalakkersuisut qaleralittarineqarsinnaasunut innersuussutigineqartut 3.000 tonsit missaannik sipporlugit pisassiisarput.
Pinngortitaleriffik ilaatigut Qeqertarsuup tunuani 20 procentinik annikinnerusunik qaleralittassiinissamik innersuussuteqarpoq.
AAMMA ATUARUK Sinerissap qanittuani qaleraleqassuseq kinguariarpoq
Taamaammat nalilersuisoqaqqittariaqartoq, KNAPK isumaqarpoq.
- Soorunami innersuussutigineqartunut qanillattortoqarsinnaanera qularutissaanngilaq. Maannakkummi pisassiissutigineqartut, takusinnaasagut malilligut, paggatassanik aalisartoqarneratigut, aamma aalisartorpassuaqalersimaneratigut umiatsiallu pitsaanerulersinneqarneratigut taakku nungunneqarsinnaasarput.
Qaleralittassat killeqareersut qaleralinniarnissamik akuersissutinik amerlasuunik tunioraaneq KNAPK-p naleqquttuusorinngilaa.
AAMMA ATUARUK Qaleralinniarnerup kinguarnera uissuumminartuunngilaq
- Qaleralinniarnermut aqutsinermi avititsisimanerput, tassalu olympisk fiskerimik aamma aalajangersimasumik pisassaliilluni aalisartitsinermut aaqqissuussisimanerput nalilersoqqittariaqalinnginneripput.
- Taamaalilluta aamma akisussaassusilimmik ingerlatsisut eqqornerlunneqassanngippata pisassiissutit killeqareersut saniatigut akuersissuterparujussuarnik tunniussuisarnerit aamma taakkua naapertuutinngilluinnaqqissaarput. Aalisarneq aalisartullu illersorlugit oqalussagaanni taava aamma aqutsinermik pilersaarusiortariaqarpoq pitsaasumik, Henrik Sandgreen oqarpoq.
Aalisarnermut Naalakkersuisoq oqaaseqartinniaraluaratsigu iluatsinngilarput.
