Avataani qaleraleqarluarnera sinerissap qanittuanut pitsaasumik sunniuteqarsinnaasoq

Avataani qaleraleqassutsit siuariaateqarsimammata qaleralittarineqarsinnaasunut innersuussutit qaffanneqarput. 

Pinngortitaleriffiup aalisakkat qaleruallillu pillugit immikkoortortaqarfiani pisortaq taama oqarpoq.

- Kalaallit Nunaata Canadallu akornanni qaleralittassiissutit agguarneqaqqissaartut pisassiissutillu pillugit innersuussutit malinneqartuartut takusinnaavarput. Taamaanneralu qaleraleqassutsimut sunniuteqarnikuunngilaq, pisortaq Helle Siegstad oqarpoq.

AAMMA ATUARUK Sinerissap qanittuani qaleraleqassuseq kinguariarpoq

Baffinip Kangerliumarngani Davis Strædemilu qaleralittassiissutit pillugit biologit 2019-imut innersuussutertik 4.070 tonsinik qaffappaat.

Sumiiffinnimi taakkunani qaleraleqassuseq pitsaasoq, Helle Siegstad oqarpoq:

- Qalerallit mikisut amerliartuinnarput, tamanna 2014-imili siuariartuinnarpoq. Taamaammat qalerallit avataaniittut siuariartornissaat periarfissagissaarpoq.

AAMMA ATUARUK Sanaartorneq qaleralinnillu tunisat ikinnerusut Halibut Greenlandimut millioninik amigartoortitsisut

Avataani qaleraleqarluarnera nunatta avannaani sinerissap qanittuanut pitsaasumik sunniuteqarnissaa, pinngortitaleriffiup neriuutigaa.

Sinerissammi qanittuani aalisartoqarpallaarnera peqqutigalugu maanna qaleralikeqisoq, pisortaq oqarpoq.

- Nalunaarsukkatsinni takusinnaavarput qalerallit mikisut avataanit sinerissap qanittuanut aalaakkaasumik pisartut. Ukiunilu kingullerni amerligaluttuinnarput, taamaammat qaleraleqarluarnera sinerissap qanittuanut pitsaasumik sunniuteqarsinnaavoq, pinngortitaleriffiup aalisakkat qaleruallillu pillugit immikkoortortaqarfiani pisortaq Helle Siegstad oqarpoq.

AAMMA ATUARUK Qaleralinniarnerup kinguarnera uissuumminartuunngilaq