Ilisimatooq: Qaleralinniarnerup kinguarnera uissuumminartuunngilaq

Ineriartorneq taanna Pinngortitaleriffimmi uumassusilerisut uissuummissutiginngilaat.

- Naamik, aalisakkat ukiuni arlalinngortuni milligaluttuinnarnerat isigaarput. Aalisapiloortoqaraangat tamanna takussutaagajuppoq. Tassalu aalisagaqatigiit anginersaasa pisarineqartarnerisigut, aalisagartat milligaluttuinnartartut, Rasmus Berg Hedeholm, Pinngortitalerifimmi aalisakkanik qalerualinnillu ilimatusartoq, oqarpoq.

Taanna naapertorlugu aalisakkat ukiuni qulini kingullerni milliartuinnavissimapput:

Pisat milligaluttuinnartut

- Soorunami pissusissamisoortumik nikerartoqartarpoq. Ilaanni anginerulaalersarput ilaannilu minnerulersarlutik. Kisianni aalisakkat pisarineqartartut ukiuni qulikkaani kingullerni milligaluttuinnartut malinnaaffigaavut.

- Nammineq misissukkatsinni takusinnaavarput aalisakkat ukiunut qulinut matuma sionarmut pisarisartakkatsinnut sanilliullugit ullumikkut affaannai pisarisinnaagigut, aalisartut aamma siornarnit tamaviaarnerullutik amerlanernik pisaqartaraluarlutik mikingaarmata tulaassat oqinnerullutik, ilisimatooq oqarpoq.

Sinerissap qanittuani qaleralinniarnermi qinigaaffimmi kingullermi biologit innersuussutaannit amerlanerusunik arlaleriarluni pisassiisoqarpoq taavalu pisassatigut killilersugaaffiunngitsuni aamma aalisarsinnaasoqarluni.

Aalisarnermut piniarnermullu naalakkersuisup susassallillu allat pisassiissutit qaffasinneri oqallinnermi illersorpaat kiisalu aalisartut ilisimasaat akuutinnerusariaqarnerannik oqariartuuteqarlutik, tamannattaaq KNR-ip Ilulissani qinersisartunik ataatsimiisitsinerani qineqqusaartut arlallit aamma ujartorpaat.

Paasissutissat atorfissaqartikkaat

Aalisartulli misigisartagaat ilanngunneqartartut, ilisimatooq oqarpoq:

- Aalisartut tamarmik logboginut immersuinissamik pisussaaffeqarput aalisakkanillu tunisigaangamik qanoq amerlatigisunik tunisaqarnerlutik ilisimatitsissutigisussaavaat. Paasissutissaq taanna pisinnaavarput qalerallillu qanoq innerinik nalilersuinitsinnut ilanngunneqartarluni.

- Tamatuma saniatigut aalisarnermit uuttuutissatut misiliutinik katersisoqartarpoq, tassani aalisakkap angissusia uuttorneqartarluni. Paasissutissallu tamakkua nalilersuinitsinni ilaasarput. Taamaattumik aalisarnermit paasissutissat pissarsiarisinnaasagut tamaasa siunnersuusiornitsinni atortarpavut, Rasmus Berg Hedeholm oqarpoq.