Pinngortitaleriffik: Sinerissap qanittuani qaleraleqassuseq kinguariarpoq
- Avannaani sinerissap qanittuani qaleraleqassuseq qimerloorutsigu peqassuseq kinguariarfiuvoq, pinngortitaleriffiup aalisakkat qaleruallillu pillugit immikkoortortaqarfiani pisortaq Helle Siegstad tusagassiortunik marlunngornermi katersuutitsinermi oqarpoq.
AAMMA ATUARUK Sanaartorneq qaleralinnillu tunisat ikinnerusut Halibut Greenlandimut millioninik amigartoortitsisut
Qaleralittassiissutit pillugit biologit 2019-imut innersuussutaat tassani saqqummiunneqarput.
Sumiiffinnilu pingasuni qaleraleqassuseq kinguariarmat innersuussutini apparpai:
- Qeqertarsuup tunuani 20 procentinik kinguariartoq, Uummannami 10 procentinik Upernavimmilu 15 procentinik kinguariarpoq, Helle Siegstad oqarpoq.
Aalisartoqarpallaartoq
Sinerissap qanittuani qaleralinniarneq siorna pitsaavallaanngilaq, Qeqertarsuummi tunuani qaleralinnik tunisat 40 procentit missaannik ikileriarput.
Aalisartoqarpallaarnera pissutaasoq, pinngortitaleriffik isumaqarpoq:
- Qalerallit amerlagallarmata angisuujullutillu, ukioqatigiit assigiinngitsut arfineq-marluk aalisarneqarput. Taakkua ikilisinneqarput, ukioqatigiit assigiinngitsut ikilillutik, maannakkullu ukioqatigiit assigiinngitsut sisamat aalisarneqarput.
NAFO - Northwest Atlantic Fisheries Organisation - ilisimatuussutsikkut pisortatigoortumik siunnersuisarpoq.
Biologit 2019-imut innersuussutigaat:
- 5.120 tonsit Qeqertarsuup Tunuani
- 5.800 tonsit Uummannami
- 5.330 tonsit Upernavimmi
Sumiiffinni taakkunani qaleraleqassutsit kinguariarput.
Silap pissusaata allanngoriartornera immallu kissassutaa peqqutaanngitsoq, taassuma ilanngullugu oqaatigaa:
- Kiassutsit taavaneersut kisitsisinngorlugit allattorsimasuutigaagut immallu naqqani ukiut 20-t ingerlanerini allanngortoqarsimaneranik takussutissartaqanngilaq, immalli kissassusaa qaleraleqassutsimut iluaqutaasoq, pisortaq inerniliivoq.
AAMMA ATUARUK Qaleralinniarnerup kinguarnera uissuumminartuunngilaq
Nunatta kitaata Tunullu imartaasa avataanni qaleraleqassutsit siuariaateqarsimammata taakkunani qaleralittarineqarsinnaasut NAFO-mit qaffanneqarput.
