Sanaartorneq qaleralinnillu tunisat ikinnerusut Halibut Greenlandimut millioninik amigartoortitsisut
Ingerlatseqatigiiffik 2017-imi 15 millionit koruuninik amigartooruteqarpoq, ukiup siuliani 2016-imi 8 millionit koruunit tungaannut sinneqartooruteqarluni.
Ingerlatseqatigiiffik 2017-imut ukiumoortumik nalunaarutimini ima allappoq:
- Qeqertarsuup tunuani qaleralinnik pisat 2017-imi ukiup siulianut naleqqiullugit ikinnerupput, tamannalu 2017-imi tunisat naatsorsuutigisamit ikinnerungaatsiarnerannik kinguneqarpoq, taamaammallu ingerlatseqatigiiffiup naammassisai isertitaalu ikileriarput.
Kisitsisit Pinngortitaleriffimmeersup naapertorlugit, Qeqertarsuup tunuani qaleralinnik tunisat siorna 40 procentit missaannik ikileriarput.
AAMMA ATUARUK Ukioq 2017 aalisarfiulluarsimanngilaq
Sanaartorneq 6,9 millioninik nalikillisinneqartoq
Suliffeqarfiup Uummannap pigisaani tunisassiorfimmik sanaartorluni 2016-imi aallartitsisimanera ukiumoortumik nalunaarusiami aamma atuarneqarsinnaavoq.
Sumiiffimmili aasaq qaqqap sisoornerata tamatumalu kingunerisaanik tassaarnerata kingunerisaanik sanaartorneq unitsinneqarpoq. Taamaammat ingerlatseqatigiiffiup sanaartornerup nalinganik nalikillisitsivoq, tamannalu angusat 6,9 millionit koruuninik ikinnerulernerinik sunniuteqarpoq.
Angusarli pitsaanngikkaluartoq pisortaqatigiit Halibut Greenlandip siumut saatsinneqarluni 2018-imi sinneqartooruteqarnissaa naatsorsuutigaat.
AAMMA ATUARUK Halibut Greenland sinneqartoorpoq