Tusagassiorfik: Qaleralinniarnermi pisarisuukkat amerlasoorujussuit igiinnarneqartarput
Eqaluissuit nuliaat tupissutillu qaleralinniarluni aalisarnermi pisarisuukkatut qaqinneqartartut aalisakkerivinnut tunisaannginnerat pissutaalluni amerlasuut ukiut tamaasa igiinnarneqartarput, atorluaanerusoqarsinnaasorli Ilulissani Uummannamilu aalisartut ilaat igasorlu kalaaleq ilisimaneqarluartoq isumaqarput.
Sermitsiaq.AG taama allappoq.
Aalisakkat assigiinngitsut 270-it Kalaallit Nunaata imartaani nassaassaapput, tamannalu pissutaalluni aalisakkat soorlu eqalussuit nuliaat tupisutillu qaleralinniarnermi pisarisoorneqartarlutik.
Pisarisuukkat tamakku igiinnarneqartarput, aalisartulli isumaqarput taakku aamma aningaasarsiutaasinnaasariaqartut, igasullu ilisimaneqarluartup Inunnguaq Hegelundip oqarnera naapertorlugu aalisakkat tamakku takornarianit alutorsaatigineqartarput atorluarneqarnerusariaqarlutillu.
Royal Greenlandili akerlianik isumaqarpoq, eqalussuit nuliaat tupissutillu qaqinneqartartut ima ikitsigisut tunisassiarineqarnissaannut tunngavissaqarani.
Ilulissat Kangerluani qimussimik qaleralinniarluni ukiuunerani aalisartoqartarpoq, tamaanilu eqalussuit nuliarpassui pisarineqartarput allaallu ima amerlatigilersimapput, tamakku aalisarnermut akornutitut isigineqartalersimallutik. Tunisaanngimmatalu igiinnarneqarneqartartut, Ilulissani aalisartoq Karl Elias Guldager oqarpoq.
– Ningittakkanik ataasiarluni amuarnermi ilaatigut 30-t angullugit angisoorujussuit qaqinneqartarput, taakkualu aalisakkerivimmut tunisaasuugaluarpata aalisartunut aningaasatigut tapertaalluarsinnaagaluarput, aalisartoq Karl Elias Guldager Sermitsiaq.AG-mut oqarpoq.
