KNAPK-mi aningaasanik peqquserlunneq politiinut suli nalunaarutigineqanngilaq
Aalisartut piniartullu kattuffiata KNAPK-p aningaasaataanit 1.050.000 koruunit amigaatigineqarput. Aningaasat sumut pisimanersut ilisimaneqanngilaq.
Aningaasat hackerinut Hong Kongimiittunut siullertut nuunneqarsimanissaat isumaliutersuutigineqaqqaaraluarpoq. Kisianni KNAPK-p siulittaasuata, Nikkulaat Jeremiassenip, maanna qularinngilluinnarpaa taamaatsoqarsimanngitsoq.
-Aningaasat nuuneqarsimasut kattuffimmiit nuunneqarsimapput, taanna paasinikuuarput. Hackerisoqarnani nammineerluni nuunneqarsimasut, Nikkulaat Jeremiassen oqarpoq.
Kisianni Nikkulaat Jeremiassen nassuiaavoq suliaq politiinut suli nalunaarutigineqarsimanngitsoq:
-Taanna politiinut suliassanngortissavarput aatsaat siulersuisut ulluinnarnilu aqutsisut piumasarippassuk, taanna oqarpoq.
Peqquserluttoqarneranik aatsaat pasitsaassisoqalinngilaq
Nikkulaat Jeremiasseni KNAPK-mi ukiut pingasut matuma siorna siulittaasunngorami aningaasanik peqquserluttoqarsimanera pasitsaatereersimavaa, maannalu nammineq atorfimmi iluani peqquserluttutut tunulequtaq nassaarisariaqarlerlugu, siulittaasoq taama oqarpoq
-Siullermik oqartoqarami hackertittoqarsimasoq, kisianni misissuisitsereernermi uanga aamma sioqqullungali paasineqarsimavoq hackertittoqarsimanngitsoq, kisianni kattuffimmi namminermiit nuussisoqarsimasoq, taanna oqarpoq.
Aningaasat tammartut kapisillit pillugit suliniaqatigiiffinnit marlunneersuupput.
Suliniaqatigiiffiit marluk tassaasut Atlantic Salmon Federation, Amerikami avannarlermi suliniaqatigiiffik, North Atlantic Salmon Fund, Atlantikup avannaani kapisillit pillugit aningaasaateqarfiusoq, taakkuusimapput KNAPK-mut ukiumut aningaasaliisaraluartut, aningaasalli millionit koruunit sinneqartut tammareernerisa kingunerisaanik aningaasaliissaarput.
Ilaasortat tapersersorneqaratik inissisimapput
Aningaasat taakku tammaaneqartut, kapisillit nunatsinni tunisassiorfinnut tunineqarsinnaangimmata aalisartut aalisakkanik allanik pisassaqarnissaannut ilaatigut atugassaagaluarput.
-Isumaqatigiissutit uku ukiunut aqqaneq marlunnut atuuttut, allaffissornermi aammalu kapisillit pisarineqartartunik ilaatigut nakkutiginninnermi atorneqartussaagalugit soorunami annaavagut.
- Unali ajornerpaajuvoq ilaasortatta inuussutissarsiornerminni kapisillit avataatigut allanut saanissaraluaminni tapiissutissaraluit pineqarneq ajormata massakkut. Ilaasortagut eqqarsaatigalugit Tamanna uggornartorujussuuvoq, Nikkulaat Jeremiassen taama oqarpoq.
