KNAPK: Ikummatissap akitsornera akuersaarneqarsinnaanngilluinnarpoq
![](/sites/default/files/styles/image_934x467/public/2023-11/Nikkulaat%20Jeremiassen%20%28002%29.jpg?itok=Lxz1ceBQ)
Ikummatissap akiata sapaatit akunnerata massuma ingerlanerani qaffanneqarnera Kalaallit Nunaanni Aalisartut Piniartullu Kattuffiata KNAPK-p akuersaarneqarsinnaanngilluinnarnerarpaa, KNAPK-lu suna tamaat unitsillugu sisamanngorpat apriilip ulluisa aqqarnanni akerliussutsimik takutitsinialersaarpoq.
- KNAPK-miit killiffik akuersaaginnarneqarusunngilaq. Aalisartorpassuit, akitigut qaffaanermi ajoraluartumik eqqugaasussanngorput, KNAPK-p siulittaasua Nikkulaat Jeremiassen oqarpoq.
Ikummatissap akiata qaffanneqarnera sinerissap qanittuani aalisartunik eqquinerlussasoq, nunattalu unammillersinnaaneranik annertuumik innarliisoq taanna isumaqarpoq.
- Sinerissap qanittuani aalisarnerup ingerlaannarnissaa ajornarsiartorpasippoq, tassami inuussutissarsiummi kajumissaatit imminullu akilersinnaasumik ingerlanissaanut toqqammaviit tamarmik piiarneqarput. Saarullinniarneq imminut akilersinnaanngereerpoq. Maannakkut sinerissap qanittuani aalisartut tamarmik erloqisinneqartussanngorput, apeqqutaatinnagu sunik aalisarnersut, Nikkulaat Jeremiassen oqarpoq.
Aalisartut aningaasarsiornikkut ilungersuasut
Aningaasarsiornikkut tatisimaneqarnerup annikillisarnissaa siunertaralugu politikkikkut iliuuseqartoqarnissaa KNAPK-miit ujartorneqarpoq.
Nuna tamakkerlugu sisamnngorpat ualikkut ataatsimut akerliussutsimik takutitsisoqarnissaa KNAPK-p maanna aarlerisaarutigaa.
Ikummatissap akiata sapaatit akunnerata massuma ingerlanerani 60 øremik qaffanneqarpoq, tassa benzin literimut 5 koruuneqalerluni gasolielu 5,15 koruuneqalerluni.Akinik qaffaanissaq KNI naalakkersuisullu aalajangigaraat.
Ikummatissanut qularnaarutissanut akit qaffakkiartormata akit qaffattariaqarsimagitsik, KNI ilisimatitsivoq.
Ikummatissat akii literimut 60 øremik nunatsinni qaffakkaluartut Danmarkimut sanilliullugu 2,5 koruunimik suli akikinnerusut aamma 20212-imiit 2021-imut akininngarnit appasinnerusut, KNI tusagassiorfinnut nalunaarummi ilanngullugu paasissutissiivoq.