Qaasuitsup Naalakkersuisut akiligassaq pillugu oqaloqartigiumagai

Qaasuitsup Kommuniani kommunalbestyrelsip kommunip marlunngorlugu avinnissaa kissaatigaa. Borgmester Ole Dorph ilisimatitsivoq.

- Kommuni marlunngorlugu avinneratigut, kommunip aappaa 10.000-it missaannik inoqassaaq, aappaa 7000-it missaannik inoqassalluni. Taamaalilluni innutaasut eqqarsaatigalugit naammaginartumik aaqqiinertut isigineqarumaartoq, isumaqarpugut, Qaasuitsup Kommuniani borgmesteri Ole Dorph oqarpoq.

Kommuni avannaaniittumut kujasinnerusumiittumullu avinneqassasoq, Kommunalbestyrelsi tamarmiusoq isummerpoq.

- Ilulissat, Ummannaq, Upernavik Qaanaarlu immikkut kommuninngussoq, taavalu Qasigiannguit, Aasiaat, Qeqertarsuaq Kangaatsiarlu immikkut kommuninngussallutik.

Aamma atuaruk Qaasuitsup Kommunia marlunngorlugu avikkumagaat

Ole Dorph nassuiaavoq, suliassaqarfinni Namminersorlutik Oqartussaniit kommuninut nuussuinissamik suliaq eqqarsaatigalugu, kommunit nutaassatut siunnersuutigisatik naammattumik angissuseqarnissaat, kommunalbestyrelsemut pingaartuusimasoq.

- Nalunngilarput, qitiusuminngaanniit suliffinnik sinerissamut ukiuni aggersuni nussuisoqartussaasoq. Kommunit mikivallaalissappata, tigooqqaasinnaanerup amma ajornartorsiutinngoriarsinnaanera pinngitsoorniarlugu, aalajangerneq attanneqarsinaasoq neriulluta, taama aalajangerpugut.

Kukkunersiuisartut suliffeqarfiutaata BDO-p nalunaarusiaa kommunalbestyrelsip oqallinneranut tunngaviliivoq. Kommuni avinneqassagaluarpat suut kingunerujumaarnersut, nalunaarusiami, Naalakkersuisunit imissutaasumi, misissuataarneqarput.

AAMMA ATUARUK Nalunaarusiaq: Kommunip avinnissaa akisussaaq

Kommunalbestyrelsip maanna aalajangernini Ole Dorph naapertorlugu Naalakkrsuisunut nassiutissavaa, taavalu kommuni avinneqarpat aningasartuutaasussat kimit akilerneqarnissaat pillugu kommuní Naalakkersuisullu oqaloqatigiissallutik.

- Marlunngornissaat massakkut siunnersuutigaarput, aamma inuit aningaasartuutitigut  akileraartarnikkullu annertuallaamik eqqorneqannginnissaat anguniarlugu. Kisianni massakkut aalajangerneq tassaavoq Naalakkersuisunut ingerlatitassarput, Ole Dorph oqarpoq.

Taanna neriuppoq, Inatsisartut ukiakkut atatsimiinneranni saqqummiunneqarsinanasumik Naalakkersuisullu isumaqatigiissuteqareersinnaajumaarlutik. Tamannalu iluatsippat, kommunalbestyrelsinut nutaanut apriilimi 2017 qinersisoqarsinnaasoq, Ole Dorphip naatsorsuutigaa.

Aaqqissuussaanermut ataatsimiitsitaliap isumaliutissiissutigaa kommuni avinneqassappat kommuni ikinnerpaamik 8.000-nik innuttaasoqartariaqartoq. 
Massakkut kommunip avinnissaanut siunniunneqartoq piviusunngussappat kommunip aappaa Aaasiaat pingaarnertut illoqarfigalugu 6.501-nik innuttaasoqassaaq aappaalu Ilulissat pingaarnertut illoqarferalugu 10.500-nik innuttaasoqassalluni. 

Massakkuugallartoq Kommune Kujalleq 6.811-nik innuttaasoqarluni kommunini inukinnersaavoq. 

BDO-p nalunaarusiaa uani atuarsinnaavat.