Nalunaarusiaq: Kommunip avinnissaa akisussaaq
Oqallinermi tunngavissatut BDO-p Naalakkersuisunit iminneqarluni nalunaarusiaa piareeqqavoq, tassanilu kommunimi avitsinermi aningaasaqarnikkut kingunerusussat misissuataarneqarsimapput.
Kommunillu marlunngorlugu amerlanerusunngorluguluunniit avinnissaa akisussasoq, BDO nalunaarusiami inerniliivoq.
Nalunaarusiami allapput, avitsineq allaffissornermut politikkikkullu aqutsinermut aningaasartuuteqarnerulernermik malitseqassasoq.
Tassalu innuttaasut tamarmik immikkut ukiumut 5.267 koruunit 6.443 koruunillu akornani kommuninut nutaanut akiliinerusassapput. Innuttaasullu ilaannaat akileraartartuummata akileraartartut ataasiakkaat akileraarutiginerusassaat malunartumik amerlassapput.
Aamma atuaruk Naalakkersuisut kommunip avinneqarnissaa pillugu suli misissuipput
Nalunaarusiami kommuniulerumaartussat ajornartorsiutigiumaagaat allat arlallit aamma taagorneqarput:
- Qaasuitsup Kommunianut suliassaqarfinni naleqquttumik piginnaasalinnik sulisussarsiorneq ajornakusooreerpoq. Kommunit agguluneqarpata tamanna suli ajornakusoornerulersinnaavoq, nalunaarusiami allapput.
Taava aamma innuttaasut 2030-p tungaanut ikiliartussasut missingiinermi takuneqarsinnaavoq, Qaasuitsup Kommunialu avinneqanngikaluarpalluunniit ineriartorneq inuit atugaasigut unammillernartoqartitsissaaq.
Tassalu kommunip aggulunnissaa innutaasut aningaasaqarnerannut eqquinerlussaaq.
Allaffeqarfimmit erseqqissarpaat nalunaarusiap misissorluarnissaanut piffissaqarsimanatik.
AAMMA ATUARUK Siumut: Kommunerujussuit naliliiffigineqarlik
AAMMA ATUARUK Najukkani oqartussaaqataaneq unammillernarsimavoq
Kommunip aningaasaqarnermut ataatsimiititaliaa agguluinissaq assigiinngitsunik pisinnaasoq kommunalbestyrelsemut inassuteqarpoq, tikkuarluguli avitsinermut Naalakkersuisut akileeqataasariaqartut.
Naalakkersuisut siulittaasuat, Kim Kielsen, KNR-imut siusinnerusukkut oqarpoq, kommunimik avitsisoqassappat, tamanna kommunit pineqartut nunatta karsianut aningaasartuutissanngortinnagu namminneq aningaasartuutigisariaqaraat.
